პარტია „ქართული ოცნება-დემოკრატიული საქართველოს“ თავმჯდომარის, პრემიერ მინისტრ გიორგი კვირიკაშვილის განცხადებით, საპარლამენტო არჩევნებში „ქართული ოცნება“ გაიმარჯვებს.

ამის შესახებ კვირიკაშვილმა პარტია „ქართული ოცნება - დემოკრატიული საქართველოს“ შიდა ქართლის მაჟორიტარი დეპუტატობის კანდიდატების წარდგენისას განაცხადა.

მისი თქმით, 2012 წელს, ურთულეს ვითარებაში, როდესაც საქართველოს ბედი წყდებოდა, ქართველმა ხალხმა ბიძინა ივანიშვილთან ერთად, მოიპოვა მნიშვნელოვანი გამარჯვება და ეს გამარჯვება მაშინ ნამდვილი გამარჯვების ტოლფასი იყო ჩვენი ქვეყნის უკეთესი მომავლისთვის.

”ამ არჩევნებშიც ჩვენ ერთად გავიმარჯვებთ. გაიმარჯვებს „ქართული ოცნება“, რომელმაც მოიტანა თავისუფლება, გაიმარჯვებს, როგორც ერთადერთი ძალა, რომელსაც დღეს შეუძლია ერის კონსოლიდაცია, ქვეყნის სწრაფი განვითარება და ხალხისთვის კეთილდღეობის მოტანა. გავერთიანდეთ მეგობრებო, კიდევ ერთხელ, ერთად დავდგეთ ჩვენი ქვეყნის უკეთესი მომავლისთვის. უნდა დასრულდეს გათითოკაცებული, ერთმანეთთან დაპირისპირებული საქართველო. ჩვენი სამშობლო უნდა გაერთიანდეს, ერთად დადგეს, ჩვენ არ გვაქვს იმის ფუფუნება, დავიხლიჩოთ ორ, სამ, ოთხ და მეტ ბანაკად. ჩვენ გვაქვს ერთი საერთო ამოცანა - ჩვენი ქვეყანა გავაერთიანოთ, ყველა ოჯახს მოვუტანოთ კეთილდღეობა და ვერავითარ შემთხვევაში ეს ამოცანა ვერ იქნება გადაჭრილი, თუ ჩვენ ვიქნებით დახლეჩილი. ამიტომ, კიდევ ერთხელ ვამბობ, ”ქართული ოცნება” არის გამაერთიანებელი ძალა, ის მიზიდულობის ცენტრი, სადაც ყველა ადამიანი, ვისაც ჩვენი ქვეყნისთვის უკეთესი მომავალი უნდა, ერთად უნდა დადგეს. ერთად უნდა ვიბრძოლოთ, ერთად უნდა ვიშრომოთ, არ უნდა დავზოგოთ საკუთარი ენერგიის არც ერთი მისხალი და ჩვენი ქვეყანა უნდა გავაბრწყინოთ. დიდი მადლობა ამ მხარდაჭერისთვის”, -განაცხადა გიორგი კვირიკაშვილმა.