ერევანში დაჯგუფება „სასნა წრერ“-ის ყველა, 20–ივე წევრი, ორკვირიანი წინააღმდეგობის შემდეგ სომხეთის ეროვნული უშიშროების სამსახურს ჩაბარდა.

სომხეთის ეროვნული უშიშროების სამსახურის ინფორმაციით, გუშინ სამართალდამცველებმა ანტიტერორისტული ოპერაცია ჩაატარეს და გაათავისუფლეს ერევნის პოლიციის განყოფილების შენობა, რომელშიც შეიარაღებული ჯგუფი იყო გამაგრებული.

„სომხეთის სამართალდამცავი ორგანოების სპეცდანიშნულების ქვედანაყოფებმა თანმიმდევრული და შეთანხმებული ქმედებებით, შეიარაღებული ჯგუფის წევრებს იარაღის დაყრა აიძულეს. დაკავებულია 20 ტერორისტი. საპატრულო-საგუშაგო სამსახურის ტერიტორია მთლიანად არის გათავისუფლებული“, - ნათქვამია განცხადებაში.

„სასნა წრერ“-ის განცხადებაში კი ნათქვამია, რომ იარაღის დაყრა ნებაყოფლობით, სისხლისღვრის აცილების მიზნით გადაწყვიტეს.

როგორც ჯგუფის ერთ-ერთმა ლიდერმა ვარუჟან ავეტისიანმა აღნიშნა, ჯგუფმა მიაღწია საკუთარ მიზანს - გააღვიძოს ხალხი და რეჟიმთან ბრძოლაზე შთააგონოს. მისივე თქმით, „სასნა წრერის“ ყველა წევრი დღეიდან თავს სამხედრო ტყვედ მიიჩნევს.

ერევანის პოლიციის განყოფილების შენობაში შეიარაღებული პირები 17 ივლისიდან იმყოფებოდნენ. ისინი „პოლიტიკური პატიმრების“, მათ შორის ოპოზიციონერი აქტივისტის, ჟირაირ სეფილიანის გათავისუფლებას, ასევე სომხეთის პრეზიდენტის გადადგომას ითხოვდნენ. 17 ივლისიდანვე პოლიციის განყოფილებასთან პოლიტიკური მოძრაობის მხარდამჭერთა აქციებიც იმართებოდა. შაბათს, 30 ივლისს, კი ერევანში შეიარაღებული დაჯგუფების მიერ დაკავებულ პოლიციის განყოფილებასთან ორმხრივი სროლებისას ერთი პოლიციელი დაიღუპა.

„მანქანაში მყოფი პოლიციის თანამშრომელი 30 წლის იურა ტეპანოსიანი შეიარაღებული დაჯგუფების მიერ კონტროლირებადი ტერიტორიიდან სნაიპერის მიერ ნასროლი ტყვიით გარდაიცვალა. ავტომანქანა პოლიციის სამმართველოს შენობიდან 400 მეტრის დაშორებით იდგა“, -განცხადა პოლიციის პრესსპიკერმა აშოტ აღარუნიანმა.