„არ ვიცი, გიორგი კვირიკაშვილს ვინ უწერს სიტყვებს, მაგრამ ხანდახან გამოსვლამდე გადაიკითხოს ხოლმე, იმიტომ, რომ ძალიან ბოლშევიკური ტექსტები არის ამ ბოლოს მოჭარბებული მის გამოსვლებში“,-განაცხადა საქართველოს თავდაცვის ყოფილმა მინისტრმა, თინა ხიდაშელმა  „მაესტროს“ ეთერში.

მისი თქმით, როდესაც გიორგი კვირიკაშვილი ამბობს, რომ საქართველოში არ არის დრო ჯგუფებად დაყოფისა, ეს საშიშია, რადგან ყოფილი მინისტრის განმარტებით, საბჭოთა კავშირში არსებობდა  მხოლოდ ერთი პარტია.

„ძალიან ვწუხვარ, რომ ამის თქმა მიწევს, მაგრამ როდესაც გიორგი კვირიკაშვილი ამბობს, რომ საქართველოში არ არის დრო ჯგუფებად დაყოფისა, ეს საშიშია. ეს საშიში ფრაზებია, იმიტომ რომ ჩვენ ასეთ ქვეყანაში 70 წელი ვცხოვრობდით. იმას საბჭოთა კავშირი ერქვა, სადაც ერთი პარტია იყო. შემდეგ „მოქალაქეთა კავშირს“ ჰქონდა ეს ამბიცია, შემდეგ „აღორძინებას”, შემდეგ „ნაციონალურ მოძრაობას“. ყველამ ძალიან ცუდად დაამთავრა...

ბევრჯერ ვთქვი და ახლაც გავიმეორებ, რომ გიორგი კვირიკაშვილი არის ის ადამიანი, რომელთან ერთადაც მე ჩემი ქვეყნის პროგრესი წარმომიდგენია. ამიტომ მას ერთადერთი რამ შემიძლია ვურჩიო - არ ვიცი, მას ვინ უწერს სიტყვებს, მაგრამ ხანდახან გამოსვლამდე გადაიკითხოს ხოლმე, იმიტომ, რომ ძალიან ბოლშევიკური ტექსტები არის ამ ბოლოს მოჭარბებული მის გამოსვლებში. აღარაფერს ვამბობ ქმედებებში, რომელსაც ადგილზე მოწადინებული განსაკუთრებულ ინიციატივის მქონე „ქართული ოცნების“ წარმომადგენლები ახორციელებენ“, – განაცხადა ხიდაშელმა.