სახელმწიფო უსაფრთხოების სამსახური შინაგან საქმეთა სამინისტროს მიმართავს, „სახალხო მოძრაობა სოციალისტური საქართველოს” მიერ დაგეგმილ ღონისძიებასთან დაკავშირებით, სადაც ორგანიზაციის მხრიდან შესაძლოა გამოყენებული იყოს კომუნისტური ტოტალიტარული სიმბოლიკა, პრევენციული ღონისძიებები გაატაროს.

სუს-ის კომისია ”თავისუფლების ქარტია” მიმართავს ასევე „სახალხო მოძრაობა სოციალისტური საქართველო“-ს თავმჯდომარეს, ვალერი კვარაცხელიას, რათა საჯარო ღონისძიების დროს არ დაუშვას და აღმოფხვრას კომუნისტური ტოტალიტარული სიმბოლიკის გამოყენება, წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ზომები.

”სახელმწიფო უსაფრთხოების სამსახურში არსებულმა კომისიამ, „თავისუფლების ქარტიამ“, საქართველოს კანონმდებლობის შესაბამისად, წერილობით მიმართა შინაგან საქმეთა სამინისტროს, 2016 წლის 4 აგვისტოს ქალაქ თელავში ა(ა)იპ „სახალხო მოძრაობა სოციალისტური საქართველო“-ს მიერ დაგეგმილ ღონისძიებასთან დაკავშირებით, სადაც ორგანიზაციის მხრიდან შესაძლოა გამოყენებული იყოს კომუნისტური ტოტალიტარული სიმბოლიკა. კომისია მიმართავს შსს-ს, საქართველოს კანონმდებლობის („თავისუფლების ქარტია“) მიზნებიდან გამომდინარე უზრუნველყოს კომუნისტური ტოტალიტარული იდეოლოგიის საფუძვლების გაღვივების წინააღმდეგ შესაბამისი პრევენციული ღონისძიებების განხორციელება და მიიღოს სათანადო ზომები. კომისიამ ასევე გაუგზავნა მიმართვა ააიპ „სახალხო მოძრაობა სოციალისტური საქართველო“-ს თავმჯდომარე ვალერი კვარაცხელიას, რათა საქართველოს კანონის, „თავისუფლების ქარტიის“ მე-7 მუხლის მე-6 პუნქტის მოთხოვნების შესაბამისად, ზემოაღნიშნულ საჯარო ღონისძიებაში არ დაუშვას და აღმოფხვრას კომუნისტური ტოტალიტარული სიმბოლიკის გამოყენება, წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ზომები”, - ნათქვამია სუს-ის განცხადებაში.