ლონდონის მერი სადიყ ხანი დედაქალაქის მცხოვრებლებს სიფხიზლისკენ მოუწოდებს.

სადიყ ხანის მოწოდებით, საეჭვო სიტუაციის შემთხვევაში მათ სამართალდამცველებს დაუყონებლივ უნდა მიმართონ.

შესაბამისი განცხადება ლონდონის მერმა მას შემდეგ გააკეთა, რაც ლონდონის ცენტრალურ ნაწილში, რასელის მოედანზე, ბრიტანეთის მუზეუმის სიახლოვეს დანით შეიარაღებულმა პირმა ერთი ქალი მოკლა, 5 კი დაჭრა.

პოლიციამ 5 წუთში,  19 წლის თავდამსხმელი მამაკაცი დააპატიმრა.

თავდაპირველად ლონდონის პოლიცია არ გამორიცხავდა, რომ მომხდარი ტერორიზმთან კავშირში ყოფილიყო, თუმცა მოგვაინებით ლონდონის პოლიციის მიერვე გაკეთდა განცხადება, რომ ფსიქიკური ჯანმრთელობა „მნიშვნელოვანი ფაქტორ“ იყო ამ ინციდენტისას.

ოთხშაბათს, 3 აგვისტოს ცნობილი გახდა, რომ ლონდონში დამატებით 600 შეიარაღებული ოფიცერი განლაგდება, რათა მოსახლეობა თავდასხმების საფრთხისაგან დაცული იყოს. აღნიშნული ინფორმაცია „როიტერსმა“ დიდი ბრიტანეთის ხელისუფლებაზე დაყრდნობით გაავრცელა.

სააგენტოს ცნობით, ლონდონში საფრთხის დონე კვლავ „ძალიან მაღალია“ და შეიარაღებული ძალების რიცხვის გაზრდა რაიმე სპეციფიკურ სადაზვერვო ინფორმაციას არ ეყრდნობა, მაგრამ ეს არის ევროპის ქვეყნებში განხორციელებული საზარელი თავდასხმებისადმი გრძელვადიანი პასუხი.

აღსანიშნავია, რომ ბრიტანეთის პოლიციის მეთოდოლოგია არ ითვალისწინებს იმას, რომ ლონდონის პოლიციის ოფიცრების უმრავლესობამ ცეცხლსასროლი იარაღი ატაროს.

„ყველასთვის, ვინც კი თვალ-ყურს ადევნებს ევროპაში მიმდინარე პროცესებს ბოლო რამდენიმე კვირის განმავლობაში, გასაგები იქნება თუ რატომ გვინდა ვაჩვენოთ ჩვენი სიმტკიცე - დავიცვათ საზოგადოება... იმისათვის, რათა გაუმკლავდე შეიარაღებულ და საზარელ თავდასხმებს, შენ გესაჭიროება ცეცხლსასროლი იარაღით აღჭურვილი ოფიცრები, რომლებიც გამოიყენებენ იარაღს თავდამსხმელების შესაჩერებლად“,-ნათქვამია ლონდონის პოლიციის მიერ გავრცელებულ განცხადებაში.

ლონდონში დამატებითი შეიარაღებული ოფიცრები საზოგადოებისთვის გამოსაჩენ ადგილებში, როგორც ფეხით, ისე ტრანსპორტით იმოძრავებენ.

ლონდონი თვითმკვლელი ტერორისტების სამიზნე 2005 წლის 7 ივლისს გახდა, როდესაც ოთხი ისლამისტი ექსტრემისტის სამიზნე 3 მეტროსადგური და ერთი ავტობუსი გახდა, რის შედეგადაც 52 ადამიანი დაიღუპა.