საკონსტიტუციო სასამართლოს მოსამართლის, მერაბ ტურავას განცხადებით, ე.წ. კაბელებისა და „რუსთავი 2“-ის საქმესთან დაკავშირებული სარჩელები შეცვლილია. მისი თქმით, მოსამართლეებისთვის უცნობია, თუ ვინ შეცვალა აღნიშნული სარჩელები.

„პარასკევს შემოსული სარჩელი დარეგისტრირებული ნომრით, შაბათ-კვირას არის სხვა სარჩელით შეცვლილი და ორშაბათს წარმოებაში მიღებული. ამის შესახებ მოსამართლეებს არ შეიძლება რომ სცოდნოდათ, თუ როგორ, რატომ, ვის მიერ და რა მიზნით მოხდა ამ სარჩელების გამოცვლა. ორი სარჩელია აქ დღის წესრიგში და ორივე სარჩელთან დაკავშირებით არის ეჭვები. ვინ შეცვალა, მე არ ვიცი. ამის გამო ვიკრიბებით, რომ ეს დავადგინოთ და გადავწყვიტოთ“, - განაცხადა ტურავამ ჟურნალისტებთან საუბრისას და დაადასტურა, რომ მის მიერ მითითებულ ორ სარჩელში ე.წ. კაბელებისა და „რუსთავი 2“-ის საქმეებთან დაკავშირებულ სარჩელებს გულისხმობს.

მერაბ ტურავას განცხადებას საკონსტიტუციო სასამართლოს თავმჯდომარის მოადგილე კონსტანტინე ვარძელაშვილი გამოეხმაურა და თქვა, რომ სარჩელების რეგისტრაციის პროცესი აბსოლუტურად გამჭვირვალე იყო.

„რეგისტრაციის პროცესი ამ საქმესთან დაკავშირებით - კაბელების საქმეს ვგულისხმობ, განხორციელდა არა მარტო კანონის და კონსტიტუციის სრული დაცვით, არამედ აბსოლუტურად გამჭვირვალედ. ნებისმიერი ეტაპი ცნობილი იყო ამ პროცესში მონაწილე ყველა მოსამართლისთვის“, - აღნიშნა ვარძელაშვილმა.

საკონსტიტუციო სასამართლოს ირგვლივ განვითარებულ მოვლენებთან დაკავშირებით პლენუმი შიდაკონსულტაციების რეჟიმში მსჯელობას აპირებს.