რძის ნაწარმის შესახებ ტექნიკური რეგლამენტის თანახმად, რძის პროდუქტების მწარმოებლებს აღარ აქვთ უფლება ბაზარზე გამოტანილ პროდუქციას, რომელიც მცენარეულ ცხიმზე მზადდება, უწოდონ „რძის მსგავსი“, „არაჟნისებრი“, „ხაჭოსებრი“ და ა.შ.

მაღაზიებში არსებული ყველა პროდუქტი, რომელსაც აწერია „კარაქი“, „არაჟანი“, „ხაჭო“ თუ „მაწონი“, მხოლოდ რძისგან დამზადებული უნდა იყოს.

2016 წლის 1-ელ აგვისტოს ამოიწურა რძის პროდუქტების მწარმოებლებისათვის მიცემული ვადა ამოიწურა.

რა ერქმევა მცენარეულ ცხიმზე დამზადებულ პროდუქციას და გააგრძელებენ თუ არა მათ წარმოებას კომპანიები, მათი გადასაწყვეტია.

სურსათის ეროვნულმა სააგენტომ ბიზნესმენებს შარშან, როდესაც რძის ნაწარმის შესახებ ტექნიკური რეგლამენტი დამტკიცდა, ერთწლიანი ვადა მისცა.

როგორც სურსათის ეროვნული სააგენტოს სურსათის უვნებლობის დეპარტამენტის უფროსმა კახა სოხაძემ „რადიო თავისუფლებას“ განუცხადა, ამ ცვლილების შესახებ რძის პროდუქტების მწარმოებელი კომპანიები დიდი ხანია გაფრთხილებულები არიან და ახლა უკვე მათ მარკეტინგულ მიდგომაზეა დამოკიდებული, თუ რა სახელით აწარმოებენ რძის შემცველ პროდუქციას.

სოფლის მეურნეობის ეროვნულმა სააგენტომ კი ამ დღეებში უკვე დაიწყო ბაზრის მონიტორინგი და იმ შემთხვევაში, თუ დარღვევებს აღმოაჩენენ, მწარმოებლებს შესაბამისი ადმინისტრაციული სასჯელი დაეკისრებათ.

„მომხმარებელთა ფედერაციის“ თავმჯდომარე მადონა კოიძე მოელის, რომ რძის პროდუქტების მწარმოებელი კომპანიები დაიცავენ ტექნიკური რეგლამენტით გათვალისწინებულ მოთხოვნებს და მომხმარებელი მაწვნის, ხაჭოს, არაჟნისა თუ კარაქაის ყიდვისას აღარ დაეჭვდება, ხომ არ არის მასში მცენარეული ცხიმი.

„თუ რძის პროდუქტების სახელით ცნობილ რომელიმე პროდუქტში მცენარეული ცხიმი აღმოჩნდება, ეს ნიშნავს, რომ პროდუქტი ფალსიფიცირებულია და ის არ არის რძის პროდუქტი“,-განაცხადა კოიძემ.

მისი თქმით, მოსახლეობის ერთ ნაწილს ხშირად ეშლება და ფიქრობს, რომ აღდგენილი რძე, ანუ ე. წ. რძის ფხვნილზე დამზადებული პროდუქტი, საფრთხის შემცველია. ის განმარტავს, რომ ეს ასე არ არის, ჩვეულებრივი რძისგან მზადდება და თავის ბუნებრივ თვისებებს არ კარგავს.

„მე, მაგალითად, მირჩევნია აღდგენილი რძისგან დამზადებული პროდუქტი შევიძინო, რადგან ჯერჯერობით საქართველოში ჯერ კიდევ არსებობს არაკეთილსაიმედო კერები და ცხოველური დაავადებების საფრთხეც, მიუხედავად სოფლის მეურნეობის სამინისტროს ვეტერინარიის სამსახურის აქტიურობისა, ბოლომდე აღმოფხვრილი არ არის“,-განაცხადა კოიძემ.