„პაატა ბურჭულაძე  - მოძრაობა სახელმწიფო ხალხისათვის” ახალგაზრდული ორგანიზაციის წარმომადგენლების განცხადებით, მიუსაფარი და ე.წ. ქუჩის ბავშვების პრობლემა კვლავ რჩება ერთ-ერთ ყველაზე აქტუალურ საკითხად.

მათი განცხადებით, ქვეყანაში ამ მიმართულებით არ არსებობს ოფიციალური სტატისტიკა, არაოფიციალური ინფორმაციით კი მიუსაფარ და ე.წ. ქუჩის ბავშვთა რაოდენობა 4 000 -ზე მეტია.

„სამწუხაროდ, ბოლო წლების განმავლობაში არ ჩატარებულა კვლევა და დღეს ფაქტობრივად არ არსებობს ოფიციალური მონაცემი,რომელიც რეალურ სურათს გვაჩვენებდა თუ რა მდგომარეობაა ქვეყანაში. არაოფიციალური მონაცემებით, (სხვადასხვა არასამთავრობო უწყებების ინფორმაციით) ქვეყანაში რამდენიმე ათასს სცდება მიუსაფარი და ქუჩაში მომუშავე ბავშვთა რაოდენობა. ბოლო 4 წლის განმავლობაში სოციალური მომსახურების სააგენტომ, მხოლოდ 634 ბავშვთან მოახერხა კონტაქტის დამყარება,რომლითაც მხოლოდ 50_ის ჩართვა მოხერხდა სახელმწიფო მზრუნველობის პროგრამაში.ეს არის არადამაკმაყოფილებელი ციფრები,რომლებიც ვერ უზრუნველყოფენ ამ პრობლემის მოგვარებას ქვეყანაში”, - განაცხადა „მოძრაობა სახელმწიფო ხალხისთვის“ ახალგაზრდული ორაგანიზაციის ხელმძღვანელმა, გიორგი თაქთაქიშვილმა.

ახალგაზრდული მოძრაობის წარმომადგენლები ხელისუფლებას უმოქმედობასა და გულგრილობაში ადანაშაულებენ და აღნიშნული პრობლემის მოგვარების მიზნით კონკრეტული ინიციატივებით გამოდიან.

„უნდა მოხდეს მობილური ჯგუფების მუშაობის გაძლიერება და სამუშაო საათების გაზრდა. დღეს „ქუჩის ბავშვებთან” მომუშავე მობილური ჯგუფები მუშაობენ 09:00-დან 18:00 საათამდე. მნიშვნელოვანია ამ ჯგუფების მორიგეობა საღამოს და ღამის საათებში, როდესაც განსაკუთრებით იზრდება ბავშვების ქუჩაში კონცენტრაცია; დაემატოს მობილური ჯგუფები დიდ ქალაქებში, მაგალითად ბათუმში, სადაც ჯგუფების ფუნქციას ძირითადად საპატრულო პოლიცია ითავსებს; მოხდეს საპატრულო პოლიციის თანამშრომლების გადამზადება ქუჩის ბავშვებთან მუშაობისა და ძალადობის გამოვლენის სპეციფიკაზე; ეფექტიანობის გაზრდის მიზნით, დაიწყოს მობილური ჯგუფების ქუჩაში პატრულირება და არ მოხდეს რეაგირება მხოლოდ შემოსული ზარების საფუძველზე.

სახალხო დამცველის ანგარიშის მიხედვით, 2015 წლის მონაცემებით, სამართალდამცავი უწყებების მხოლოდ 40 თანამშრომელს ჩაუტარდა ტრეინინგი მიუსაფარი ბავშვების მიმართ ჩადენილი დანაშაულის იდენტიფიცირებისა და გამოძიების საკითხებზე, მაშინ როდესაც მობილური ჯგუფები მხოლოდ თბილისში მუშაობენ. რეგიონებში ამ ფუნქციის შესრულება საპატრულო პოლიციას უწევს,რომელსაც შესაბამისი კვალიფიკაცია არ გააჩნია“,-განაცხადა თაქთაქიშვილმა.

მისი თქმით, საქართველოში სოც მუშაკების რაოდენობასთან დაკავშირებული პრობლემაცაა.

„ასევე უნდა აღინიშნოს რომ დღეს,სოციალური მომსახურების სააგენტოში სულ რაღაც 240 სოც მუშაკი მუშაობს, რომლებსაც ამ საკითხებთან ერთად 25 მიმართულებაზე უწევთ მუშაობა.არადა ევროპული სტანდარტით ქვეყანაში მოსახლეობის რაოდენობით მინიმუმ 2 ჯერ უნდა გაიზარდოს სოციალური აგენტების მუშაობა რომ მათ მუშაობას ჰქონდეს აზრი და მოხდეს ამ პრობლემების ეტაპობრივად გამოსწორება“, - განაცხადა თაქთაქიშვილმა.