ტრისტან წითელაშვილის თემა "ნაციონალური მოძრაობისა" და "რუსთავი 2"-ის მიერ სპეციალურად წამოწეული თემაა, - აღნიშნული განცხადება წითელაშვილის სკანდალთან დაკავშირებით, პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა გააკეთა.

„როცა ნაცმოძრაობას სალაპარაკო არა აქვს, მაშინ წამოწევენ ხოლმე მსგავს თემებს, რომ "რუსთავი 2"-ის ბადე შეავსონ. დარწმუნებული ვარ, იქ არანაირი საიდუმლო რეჟიმის დარღვევა არ ყოფილა. თემის ხელოვნური ინსპირირება მოხდა. მიუხედავად ამისა, ჩვენ უკვე მივმართეთ პროკურატურას, რათა საზოგადოებას არ დარჩეს პასუხგაუცემელი კითხვა," - აღნიშნა ირაკლი სესიაშვილმა.

გადაცემა „პოსტ სკრიპტუმის“ მიერ გავრცელებული ინფორმაციით, გაერთიანებული შტაბის ყოფილი უფროსი, გენერალი გიგი კალანდაძე ამტკიცებს, რომ აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა. სიუჟეტის თანახმად, პოლკოვნიკი ტრისტან წითელაშვილი საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო, წითელაშვილმა კი საიდუმლო ობიექტები ფირზე გადაიღო. ტრისტან წითელაშვილი „რუსთავი 2“-ს სიცრუის გავრცელებაში ადანაშაულებს და ტელეკომპანიის წინააღმდეგ სასამართლოში სარჩელის შეტანას აპირებს.