"სამწუხაროდ, პრეზიდენტი მოიქცა ისე, როგორც ბესელია, ანუ უთავმოყვარეოდ", - აღნიშნული განცხადება "ერთიანი ნაციონალური მოძრაობის" მედია მდივანმა, ირმა ნადირაშვილმა ივა ჩიღვინაძის პრეზიდენტის კონსულტანტად დანიშვის თაობაზე გააკეთა.

”მაშინ, როცა ქვეყანა უფსკრულის პირას მიიყვანეს და ხალხი გააღარიბეს, ივანიშვილი და ერთ დროს მისი რჩეული მარგველაშვილი ქვეყნის მუქ ტრადიციებში მართვას აგრძელებენ. გამოძიებით დადგენილია, რომ ჩიღვინაძე ბურჯანაძის იმ ესკორტის წევრი იყო, რომელიც 26 მაისს პოლიციელების კორდონს დაეჯახა და ერთ-ერთის სიცოცხლე იმსხვერპლა. დასჯის ნაცვლად კი, მთავრობამ ის პოლიტპატიმრად გამოაცხადა და ახლა პრეზიდენტმა სახელმწიფო სამსახურში აიყვანა. ეს ნიშნავს, რომ მარგველაშვილმა კიდევ ერთხელ მიაყენა ტრამვა გარდაცვლილი პოლიციელის ოჯახს; ყველა პოლიციელს, ვინც სამშობლოს ემსახურება. მარგველაშვილმა სამწუხაროდ კიდევ ერთხელ გამოავლინა უნებისყოფობა და წინააღმდეგობა ვერ გაუწია მათ, ვინც პოლიციელის მკვლელის სახელმწიფო სამსახურში აყვანა სთხოვა. სამწუხაროდ, პრეზიდენტი თავადაც არ უფრთხილდება ინსტიტუტებს და იმ ფუნდამენტს, რაზეც სახელმწიფოს და ჩვენი მოქალაქეების უსაფრთხოება დგას. 8 ოქტომბერს ჩვენ დავასრულებთ ქვეყნის რღვევას და ახალი ენერგიით დავიწყებთ წინსვლას“, - აღნიშნა ირმა ნადირაშვილმა.

პრეზიდენტის საპარლამენტო მდივანი, ანა დოლიძე ადასტურებს, რომ ივა ჩიღვინაძე პრეზიდენტის კონსულტანტად დაინიშნა.

“თავის ჩვეულ სტილში ”ნაციონალური მოძრაობა, ამჯერად მტკნარი სიცრუით აგრძელებს უკვე მეორე წრეზე იმ ხალხის დევნას, რომელიც თავის დროზე მონაწილეობდა წინააღმდეგობის მოძრაობაში და რომელიც უკვე ერთხელ იყო პოლიტიკური დევნის მსხვერპლი. ეს სამწუხარო რეალობა არის “ქართული ოცნების“ ხელისუფლების უნიათობის ბრალი ნაწილობრივ. ივა ჩიღვინაძე ნამდვილად იმუშავებს პრეზიდენტის კონსულტანტად და მისი უშუალო საქმე იქნება სწორედ ის, რომ ყველა ის ადამიანი, ვინც მონაწილეობას იღებდა წინააღმდეგობით მოძრაობაში, სააკაშვილის რეჟიმის წინააღმდეგ და იყო პოლიტიკურად დევნილი, სრულად აღდგეს საკუთარ უფლებებში“, - აღნიშნა ანა დოლიძემ.