თერჯოლის მუნიციპალიტეტის გამგებელმა, თეიმურაზ ჯაფარიძემ 8 აგვისტოს ომში საქართველოს ერთიანობისთვის დაღუპულ გმირთა ხსოვნის პატივსაცემად მემორიალები ყვავილებით შეამკო. გამგებელი დაღუპული გმირების საფლავებზეც გავიდა და ასევე მათი ოჯახების წევრებს შეხვდა.

თერჯოლის მუნიციპალიტეტის გამგეობის ინფორმაციით, ღონისძიება დაიწყო სოფელ ღვანკითიდან. აგვისტოს ომში დაღუპული ვალერი გოგნაძის მემორიალთან იმყოფებოდნენ საკრებულოს თავმჯდომარე ავთანდილ ჩუბინიძე, მოადგილე სოფიო ბუსკივაძე, თერჯოლის მაჟორიტარი დეპუტატი, 8 აგვისტოს ომის მონაწილე, თადარიგის ავიაციის პოლკოვნიკი გიორგი ლილუაშვილი, გამგეობის განათლების, კულტურის, სპორტისა და ახალგაზრდობის საქმეთა სამსახურის უფროსი გურამ თურქაძე და ადგილობრივი ხელისუფლების სხვა წარმომადგენლები. მათ გვირგვინებითა და ყვავილებით შეამკეს მემორიალი და წუთიერი დუმილით პატივი მიაგეს გმირთა ნათელ ხსოვნას. მამა ანდრია ყიფიანმა კი დაღუპულთა სულების მოსახსენებელი პანაშვიდი გადაიხადა.

თერჯოლის მუნიციპალიტეტის გამგებელი თეიმურაზ ჯაფარიძე გამგეობის განათლების, კულტურის, სპორტისა და ახალგაზრდობის საქმეთა სამსახურის უფროს გურამ თურქაძესა და გამგეობის სხვა თანამდებობის პირებთან ერთად ასევე იმყოფებოდა სოფელ ძევრში, სადაც ყვავილებით შეამკო უშანგი სოფრომაძის მემორიალი, სოფ. ბარდუბანში კი უგზო-უკვლოდ დაკარგულ ალია ბარდაველიძის ოჯახს ეწვია, ხოლო სოფ. კვახჭირსა და ჭოგნარში გიგა სახელაშვილისა და ბადრი ბასილაძის საფლავებს მიაგო პატივი.

2008 წლის რუსეთ-საქართველოს ომში თერჯოლიდან 5 მებრძოლი დაიღუპა. მათ ოჯახებს ადგილობრივი ბიუჯეტიდან ფულადი დახმარება გადაეცა.