მოწინააღმდეგის დასუსტების მიზნით გადაბირების მეთოდს ძალიან აქტიურად მიმართავდა ”ნაციონალური მოძრაობა”, ახლა ამას აკეთებს ”ქართული ოცნება”, - აცხადებს ”რესპუბლიკური პარტიის” ერთ-ერთი ლიდერი ლევან ბერძენიშვილი ბოლო პერიოდში ოპოზიციური პარტიებიდან, მათ შორის ”რესპუბლიკური პარტიიდან” გარკვეული წევრების ”ქართულ ოცნებაში” გადასვლასთან დაკავშირებით.
ბერძენიშვილის თქმით, "იმ პარტიის წარმომადგენლები, რომლებიც თავის პარტიას ტოვებენ და გადადიან სახელისუფლებო პარტიაში, მორალურად უფრო უსიმპათიოდ გამოიყურებიან".
"მორალური თვალსაზრისით ეს ლამაზი პროცესი არ არის და გაუმართლებელია. მაგრამ ამავე დროს, ეს მოძრაობა არის ორმხრივი. ეს არ არის ცალმხრივი ამბავი. არამარტო იზიდავენ ადამიანებს ასეთ შემთხვევაში, არამედ ადამიანებიც ეზიდებიან. შესაბამისად, იმ პარტიის წარმომადგენლები, რომლებიც თავის პარტიას ტოვებენ და გადადიან სახელისუფლებო პარტიაში, მორალურად უფრო უსიმპათიოდ გამოიყურებიან. ამბობენ, რომ ყველას აქვს თავისი არჩევანი და გააკეთეს თავისი არჩევანი, მაგრამ ეს არა პოლიტიკური, არამედ მორალური არჩევანია. პოლიტიკური არჩევანი კეთდება ჩვეულებრივ დღეებში და არა არჩევნების დროს. არჩევნების დროს ასეთ გადაწყვეტილებას სხვა სახელი ჰქვია, რომელზეც მე თავს არ შევიწუხებ. ეს ხალხი არც იმათ გამოადგებათ, ვინც გადაიბარა და არც თავის თავს გამოადგებათ. პოლიტიკაში პარტიის გამოცვლა „მოსულა“.
მაგალითად, აშშ-ის ყველაზე დიდი პრეზიდენტი რონალდ რეიგანი, ახალგაზრდობაში როგორც მსახიობების დიდი ნაწილი, ”დემოკრატი” იყო და შემდეგ ”რესპუბლიკელი” გახდა. თუმცა, ეს მისი ნამდვილი პოლიტიკური არჩევანი იყო და არა ”რესპუბლიკური პარტიის” მიერ მისი გადაბირება რომელიმე არჩევნების წინ.
მე შემიძლია დავასახელო მაგალითები მაჟორიტარების სახით, რომლებიც იყვნენ ყველა პარტიაში, ვინც კი იყო ხელისუფლებაში - შევარდნაძის დროს იყვნენ შევარდნაძესთან, აბაშიძის დროს იყვნენ აბაშიძესთან, მერე ისევ შევარდნაძესთან, შემდეგ სააკაშვილთან, შემდეგ ივანიშვილთან და ახლა ”ქართულ ოცნებასთან”. მათ პრობლემა არ აქვთ, არიან ასეთი ადამიანები. ოღონდ, რამდენად არიან ისინი პოლიტიკოსები, ეს სხვა საკითხია. ადამიანი, რომელიც 8 პარტიას გამოიცვლის, არ შეიძლება პოლიტიკოსად მივიჩნოთ. ის არის ჩვეულებრივი მედროვე. ისინი ამბობენ, რომ პარტიულზე მაღლა დააყენეს სამშობლოს ინტერესები. სინამდვილეში არც პარტია და არც სამშობლო არაფერ შუაშია. აქ მთავარი მოქმედი პირი არის კუჭი. მე ეჭვი მეპარება, რომ ერთგულებაზე მაღალი ღირებულება არსებობდეს”, - განაცხადა ბერძენიშვილმა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.