"თავისუფალი დემოკრატების" გორის ორგანიზაციის წარმომადგენელი, გორის საკრებულოს სამანდატო საპროცედურო საკითხთა კომისიის თავმჯდომარე თამარ თედლიაშვილი აცხადებს, რომ თამაზ შიოშვილს "თავისუფალი დემოკრატების" დატოვების სანაცვლოდ, "ქართული ოცნებიდან" გუბერნატორობა შესთავაზეს.

თედლიაშვილი ვარაუდს გამოთქვამს ასევე დავით წეწვაძის მიერ "თავისუფალი დემოკრატების" რიგების დატოვების მიზეზებზე.

„სამწუხაროდ, მან იცრუა, როცა თქვა, რომ ჩვენი პარტია გუნდთან ერთად დატოვა - ეს ასე არ არის. არის ინფორმაცია, რომ თამაზ შიოშვილსა და ბატონ წეწვაძეს მართავს "ქართული ოცნება". ჩემთვის ძალიან საწყენი იყო ბატონი თამაზ შიოშვილის გადაწყვეტილება, რადგან არავისთვის არ არის უცხო, რომ ის და ბატონი ირაკლი დიდი ხნის მეგობრები და თანამებრძოლები იყვნენ. შიოშვილი პარტიის დაარსებიდან ჩვენი გუნდის აქტიური წევრი იყო. მე შიოშვილისგან შევიტყვე, რომ მმართველი გუნდიდან მას გუბერნატორის პოსტის დაკავება შესთავაზეს, ამაზე საუბრობენ ქალაქში და საუბრობენ "ქართულ ოცნებაშიც". შიოშვილს გუბერნატორის თანამდებობა ყოველთვის სურდა“, - აღნიშნა "თავისუფალი დემოკრატების" გორის ორგანიზაციის წარმომადგენელმა.

თამარ თედლიაშვილი თავდაცვის ყოფილი მინისტრის ირაკლი ოქრუაშვილზეც საუბრობს და აცხადებს, რომ ის ერთხელ უკვე იყო გორის ხელისუფლებაში, თუმცა რეგიონისთვის სასიკეთო ვერაფერი გააკეთა.

"გორში არსებობენ ადამიანები, რომლებსაც წაართვეს ბიზნესები, მიაყენეს ძალიან დიდი ფინანსური ზარალი. მაგალითად, გიორგი ორთანიზაშვილი, რომელიც წილს გორის წისქვილკომბინატში ფლობდა, ირაკლი ოქრუაშვილმა კი მას ეს ქონება წაართვა და ამის აღიარება ტელევიზიით მოუხდა. დარწმუნებული ვარ, ამომრჩეველი ღირსეულ გადაწყვეტილებას მიიღებს. პარლამენტი არ არის კანტორა. იქ წარმოდგენილი უნდა იყვნენ ისეთი ადამიანები, რომლებსაც ხალხის ცხოვრების უკეთესობისკენ შეცვლა და მათზე ზრუნვა შეუძლიათ. ეს რესურსი ბატონ ირაკლის ნამდვილად გააჩნია",- აღნიშნა თედლიაშვილმა.