საარჩევნო ბლოკი „თამაზ მეჭიაური – ერთიანი საქართველოსთვის“ არჩევნებში მონაწილეობას კოალიციურ რეჟიმში მიიღებს.

კოალიციას „სახალხო ხელისუფლება“, „ქართული იდეა“ და „ქალთა პარტია“ შეუერთდა.

„ჩვენ გვაქვს თითქმის ყველა პოლიტიკურ სუბიექტთან მოლაპარაკება, ვისთვისაც მნიშვნელოვანია ეროვნული ფასეულობები. რაც შეეხება „ქართულ ოცნებასთან“ ჩვენს მოლაპარაკებებს, მე არ მქონია მათ წევრებთან კონსულტაციები, რადგან საგარეო კუთხით გვაქვს აზრთა სხვადასხვაობა. ჩვენი გაერთიანების მთავარი იდეაა ეროვნული ფასეულობები, ჩვენ, რა თქმა უნდა, ვფიქრობთ, რომ საქართველო არ უნდა იყოს დამოკიდებული რომელიმე ქვეყანაზე, ეს იქნება რუსეთი თუ ამერიკა. თუმცა ეს იმას არ ნიშნავს, რომ ჩვენ კონფრონტაციულები ვიყოთ რუსეთთან. საჭიროა, რომ ამერიკის შეერთებულ შტატებთან გავაუქმოთ სამხედრო შეთანხმებები, ასევე მნიშვნელოვანია, რომ ჩვენ უარი ვთქვათ ნატოზე. რადგან ეს დამატებით პრობლემას უქმნის ქვეყანას. ჩვენი კარი ყველა პოლიტიკური პარტიისთვის ღიაა, ვისთვისაც ეს ღირებულებები მნიშვნელოვანია და ჩვენს შეხედულებებს იზიარებს“, - განაცხადა მეჭიაურმა.