თბილისის მერი დავით ნარმანია, მერიის ეკოლოგიისა და გამწვანების საქალაქო სამსახურის უფროსის მოადგილესთან, სოსო ქარცივაძესთან და ვაკის რაიონის გამგებელთან, ნოდარ ტურძელაძესთან ერთად, თამარაშვილის ქუჩის გზის გამყოფ ზოლზე მდებარე ხეივნის სარეაბილიტაციო სამუშაოებს გაეცნო.

თბილისის მერიის პრესსამსახურის ცნობით, სამუშაოების ფარგლებში, თამარაშვილის ქუჩის გზის გამყოფი ზოლის 1200 მეტრიან მონაკვეთზე დაიგება ქვაფენილი, დაირგვება 2900 ძირი ბუჩქოვანი მცენარე და მოეწყობა მწვანე ბალახის საფარი. გარდა ამისა, თამარაშვილის ქუჩაზე უკვე დასრულდა ახალი სარწყავი სისტემის გაყვანა და დამონტაჟდა გარე განათების 110 ბოძი. აღნიშნულ ტერიტორიაზე იგეგმება საბაღე ფურნიტურის, ნაგვის ურნებისა და სკამების შეცვლაც.

თბილისის მერის განცხადებით, გზის გამყოფ ზოლზე მდებარე ხეივნის რეაბილიტაცია სექტემბრის შუა რიცხვებში დასრულდება, რის შემდეგაც, შემოდგომაზე, აღნიშნულ ტერიტორიაზე გამწვანების სამუშაოები დაიწყება.

„თამარაშვილის ხეივანში დაირგვება მცენარეები და მწვანე ბალახის საფარი. უკვე მზად არის სარწყავი სისტემაც. მიმდინარე სამუშაოების დასრულების შემდეგ, ჩვენ ძალიან საინტერესო სკვერს მივიღებთ. აქ განთავსდება სკამები, იქნება საჯარო ინტერნეტი, რაც დამატებით მოიზიდავს ახალგაზრდებს და იმ პირებს, რომლებსაც სურთ დასვენება და გართობა“- განაცხადა დავით ნარმანიამ.

მიმდინარე სამუშაოებს კომპანია „Green service plus“-ი აწარმოებს. სამუშაოებს ზედემხედველობას თბილისის მერიის ეკოლოგიისა და გამწვანების სამსახური უწევს.