„რესპუბლიკური პარტიის“ ერთ-ერთი წევრის, თამარ კორძაიას განცხადებით, საქართველოს უბლოკო სტატუსი ისეთივე საფრთხის მატარებელია, როგორც „ცენტრისტების“ ინიციატივა.

მისი თქმით, განსაკუთრებულ მნიშვნელობას იძენს „რესპუბლიკური პარტიის“ ინიციატივა საგარეო პოლიტიკური პრიორიტეტის კონსტიტუციაში განსაზღვრის თაობაზე.

„ქართული ოცნების“ რეაქცია ჩვენს ინიციატივასთან დაკავშირებით ადასტურებს, რომ ისინი გრძელვადიან პერსპექტივაში ვერ ხედავენ იმ საფრთხეს, რაც უბლოკო სტატუსის შესახებ ინიციატივას აქვს და რაც, ამ წუთას, ბედუკაძის კლიპში დაინახეს. ქვეყნის უსაფრთხოების საკითხი სწორედ რომ კონსტიტუციით უნდა განისაზღვროს“, - განაცხადა თამარ კორძაიამ.

პარლამენტის ბიურო „დემოკრატიულ მოძრაობის“ ლიდერის, ნინო ბურჯანაძის ინიციატივას განიხილავს. საუბარია კონსტიტუციაში უბლოკო სტატუსის შესახებ დათქმის ჩაწერაზე. პარლამენტის თავმჯდომარე დავით უსუფაშვილი კი საკონსტიტუციო ცვლილებების მიღების წინადადებით გამოდის, რომლის მიხედვითაც, კონსტიტუციის პრეამბულაშივე უნდა დაფიქსირდეს ქვეყნის ევროატლანტიკური არჩევანი.