პირველი ვიცე პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი სამშენებლო და საპროექტო ორგანიზაციებს ამბროლაურის აეროდრომისა და ქუთაისის აეროპორტთან დაკავშირებულ ტენდერებში მონაწილეობის მიღებისკენ მოუწოდებს.

მისი თქმით, გამოცხადდება გამარტივებული ელექტრონული ტენდერი ორი მიმართულებით - ესაა ამბროლაური და ქუთაისის საერთაშორისო აეროპორტი.

„დღეს მთავრობაზე ჩვენ გამოვიტანეთ ნებართვის მოწონება, რომლის მიხედვითაც ჩვენ გამოვაცხადებთ გამარტივებულ ელექტრონულ ტენდერს. მინდა ყველა სამშენებლო და საპროექტო ორგანიზაციას მოვუწოდო აღნიშნულ ტენდერში მონაწილეობის მიღებისკენ. გამოტანილი იქნება ორი მიმართულება. ერთი - ეს არის ამბროლაური, სადაც 1 100 მეტრიანი ასაფრენ-დასაფრენი ზოლი და ასევე, ტერმინალი იქნება ასაშენებელი. ხოლო მეორე მიმართულება, ეს არის ქუთაისის საერთაშორისო აეროპორტში ინფრასტრუქტურის გაფართოება“, - განაცხადა ქუმსიშვილმა.

მინისტრმა ასევე აღნიშნა, რომ ავიაკომპანია „ვიზეარი“ სექტემბერში ქუთაისიდან შვიდი ახალი მიმართულებით დაიწყებს ფრენას და სექტემბრიდან ევროპის მიმართულებით 23 სიხშირე იქნება, რაც, მისი განცხადებით, დადებითად აისახება, როგორც ტურისტულ ნაკადზე, ასევე იმ შესაძლებლობებზე, რომ ჩვენმა მოქალაქეებმა უკვე უპრობლემოდ იფრინონ ევროპაში.

როგორც მთავრობის დღევანდელ სხდომაზე გახდა ცნობილი, ამბროლაურში, აეროდრომის მშენებლობის დასრულება წლის ბოლოსთვის იგეგმება, - აეროპორტის მშენებლობის, აღჭურვის და ოპერირებაში შეყვანის მიზნით განსახორციელებელი ღონისძიებების სწრაფად შესრულების მიზნით, მთავრობა გამარტივებულ შესყიდვას მიმართავს.

გაზრდილი მგზავრთა ნაკადის მომსახურებისთვის, დამატებითი ინფრასტრუქტურის მშენებლობა იგეგმება ქუთაისის საერთაშორისო აეროპორტშიც, რომელსაც 23 სექტემბრიდან, ევროპისკენ 7 მიმართულება ემატება.