პარლამენტის თავმჯდომარის, „რესპუბლიკური პარტიის“ საარჩევნო სიის პირველი ნომერის, დავით უსუფაშვილის განცხადებით, „ქართული ოცნების“ მხრიდან ქართველი ხალხისთვის შეთავაზებული მაჟორიტარი დეპუტატობის კანდიდატები ამ ოთხი წლის განმავლობაში ყველაზე უფრო პასიურობით გამორჩეული ადამიანები არიან.

მისი თქმით, ოთხი წლის განმავლობაში პარტია „ქართულ ოცნებას“ ჰქონდა შესაძლებლობა იმისა, რომ ქართველი ხალხისთვის უკეთესი შეთავაზება გაეკეთებინა.

„როდესაც პოლიტიკურ პარტიას აქვს პრეტენზია, პარლამენტში ერთპარტიულ საკონსტიტუციო უმრავლესობაზე, როდესაც კანდიდატებს ასახელებს, ერთპარტიულ საკონსტიტუციო უმრავლესობას გვისახელებს. მე ჩემი ქვეყნისთვის ვისურვებდი გაცილებით მაღალკვალიფიციურ, გაცილებით პროფესიონალურ პარლამენტს, უმრავლესობას. მეც მაქვს ერთი სპეციფიკური საკითხი, რომელსაც გულისტკივილით ვამბობ: სამწუხაროდ, ამ ოთხის წლის განმავლობაში ყველაზე უფრო პასიურობით გამორჩეული ადამიანები არიან შეთავაზებული ქართველი ხალხისთვის, თუმცა ეს უკვე ხალხის არჩევანია, მათი გადასაწყვეტია“, - განაცხადა დავით უსუფაშვილმა.

მისივე შეფასებით, თავად „რესპუბლიკელების“ სტანდარტი შეთავაზებულ კანდიდატებთან დაკავშირებით ერთ-ერთი ყველაზე მაღალია.

„ჩემი პოზიცია ისაა, რომ „რესპუბლიკელებმა“ ქართველ ხალხს ძალიან ღირსეული კანდიდატები შევთავაზეთ. თითქმის ჩვენი ყველა მეორე მაჟორიტარი ქალი კანდიდატია, ამიტომ მითი, რომ მაჟორიტარულ ოლქებში ქალი კანდიდატები ვერ იბრძვიან და იმარჯვებენ, სწორი არ არის“, - აღნიშნა უსუფაშვილმა.