თერჯოლის მუნიციპალიტეტის გამგებელმა თეიმურაზ ჯაფარიძემ თუზის ადმინისტრაციული ერთეულის სოფ. თავასაში ადგილობრივი მოსახლეობის მოთხოვნით შეხვედრა გამართა.

თერჯოლის მუნიციპალიტეტის გამგეობის ინფორმაციით, 2016 წელს „სოფლის მხარდაჭერის პროგრამით“ სოფ. თავასისათვის გამოყოფილია 10 415 ლარი. ამ თანხით შეძენილია 2 სანიაღვრე მილი (თითოეული 3 მ სიგრძისა და 400 მმ დიამეტრის), ხოლო დარჩენილი თანხით უნდა დაიგოს 224 კვ. მეტრი ბეტონის საფარი. გამგებელთან შეთანხმებით გადაწყდა, თუ რომელ მონაკვეთზე დაიგება გზა, კერძოდ ეს იქნება, როგორც მოსახლეობის უმეტესობა მოითხოვდა, შიდა საუბნო გზა.

შეხვედრაზე ასევე დაისვა მოსახლეობისათვის პრობლემური გაზიფიკაციის საკითხი.

"თერჯოლის მუნიციპალიტეტის ტერიტორიაზე 2013 წელს სააქციო საზოგადოება „საქორგგაზის“ დაკვეთით გაზიფიცირების პროექტის შედგენის დროს დაშვებული იყო შეცდომები, კერძოდ პროექტში არ იყო შეტანილი ზოგიერთი უბანი, მათ შორის სოფ. თავასა. ამის გამო ბუნებრივი აირის შეყვანა ვერ ხერხდება მუნიციპალიტეტის მასშტაბით 1 259 ოჯახში. თერჯოლის მუნიციპალიტეტის გამგეობამ, ვინაიდან აღნიშნული საკითხის მოგვარება არ შედიოდა მის კომპეტენციაში, გასულ და მიმდინარე წელს შუამდგომლობით მიმართა საქართველოს ენერგეტიკისა და ბუნებრივი რესურსების სამინისტროს, რის შემდეგაც მოხდა პროექტში გამოტოვებული უბნების შეტანა და საქართველოს მთავრობის №1632 დადგენილების საფუძველზე ეტაპობრივად მოხდება როგორც გამოტოვებული უბნების, ასევე მთლიანი მუნიციპალიტეტის გაზიფიცირება", – აცხადებენ თერჯოლის მუნიციპალიტეტში.

თერჯოლის მუნიციპალიტეტის გამგებელმა, თეიმურაზ ჯაფარიძემ სოფელ თავასის მოსახლეობას პირობა მისცა, რომ ყველა ღონეს იხმარს, რათა აღნიშნულ უბანში 1 წლის განმავლობაში გაზიფიკაციის პრობლემა მოგვარდეს.