პარტია „ნინო ბურჯანაძე-დემოკრატიული მოძრაობა“ უბლოკო სტატუსზე ხელმოწერების შეგროვებას იწყებს.

როგორც პარტიის ერთ-ერთმა ლიდერმა, გიორგი ახვლედიანმა განაცხადა, ხელმოწერების შეგროვება საქართველოს მთელს ტერიტორიაზე იგეგმება.

მისი თქმით, ეს უმნიშვნელოვანესი ინიციატივა, პარლამენტში „ნინო ბურჯანაძე - დემოკრატიულ მოძრაობასთან“ ერთად უნდა შევიდეს.

„ჩვენ ვიწყებთ უბლოკო სტატუსზე ხელმოწერების შეგროვებას, თუმცა ახლა ჯერი საპროცედურო კომიტეტზეა, რომელმაც უნდა გადმოგვცეს ის ბლანკი, რომლითაც ჩვენ 200 ათასი მოქალაქის ხელმოწერა უნდა შევაგროვოთ. იმედს გამოვთქვამთ, რომ კომიტეტი ხვალვე მიიღებს გადაწყვეტილებას და დროის უაზროდ გაჭიმვას ადგილი არ ექნება. დიახ, ჩვენ შეგვეძლო ეს ინიციატივა გასულ წელს გაგვეჟღერებინა და ხელმოწერებიც წარგვედგინა პარლამენტისთვის, მაგრამ კოჰაბიტირებული „ოცნების“ და „ნაციონალების“ პარლამენტში უბლოკო სტატუსის ინიციატივის შეტანა მის ჩასავარდნად გაწირვას ნიშნავდა. სწორედ ამიტომ ეს უმნიშვნელოვანესი ინიციატივა, რომელსაც ასობით ათასი ჩვენი მოქალაქე მოაწერს ხელს, პარლამენტში „ნინო ბურჯანაძე - დემოკრატიულ მოძრაობასთან“ ერთად უნდა შევიდეს, რათა სწორედ ჩვენ ვიყოთ ამ ინიციატივის ბოლომდე მიყვანის გარანტი“, - განაცხადა გიორგი ახვლედიანმა.

პარლამენტში, ბიუროს სხდომაზე „უბლოკო“ სტატუსთან დაკავშირებით ინიციატივა დღეს დარეგისტრირდა. ნინო ბურჯანაძის საინიციატივო ჯგუფის მიერ წარდგენილი დოკუმენტი საპროცედურო საკითხთა კომიტეტს შესასწავლად გადაეცა.