მოძრაობა „პაატა ბურჭულაძე - სახელმწიფო ხალხისთვის“ ისნის #8 საარჩევნო ოლქის აღმასრულებელმა მდივანმა, ვაზისუბნის მაჟორიტარი დეპუტატობის კანდიდატმა, ზურაბ პინაიშვილმა დატოვა.

პინაიშვილის განცხადებით, პარტიის დატოვების მიზეზი მოძრაობის  ხელმძღვანელობის მიერ „ნაციონალური მოძრაობის” სატელიტ პარტიებთან  გაერთიანების შესახებ მოლაპარაკებების წარმოებაა.

„პარტიის ხელმძღვანელობა შემჩნეულია „ნაციონალური მოძრაობის“ ლიდერებთან აქტიურ კავშირში. ისინი ასევე აწარმოებენ მოლაპარაკებებს გაერთიანებაზე „ნაციონალური მოძრაობის” სატელიტ პარტიებთან. მე როგორც მაჟორიტარი დეპუტატობის კანდიდატი და ისნის #8 საარჩევნო ოლქის აღმასრულებელი მდივანი, არავის ჩავუყენებივარ საქმის კურსში „ნაციონალური მოძრაობის“ სატელიტ პარტიებთან, „გირჩთან“ და „ახალ საქართველოსთან“ გაერთიანების შესახებ და არც აზრი უკითხავს არავის. აქედან გამომდინარე, მიმაჩნია, რომ საქმე გვაქვს პოლიტიკურ ავანტურასთან პაატა ბურჭულაძის სახით. ყოველივე ზემოხსენებულიდან გამომდინარე მე და ჩემი თანაგუნდელები ვემიჯნებით „ნაციონალურ მოძრაობის“ წევრებთან კავშირს და პაატა ბურჭულაძის მხრიდან თავისი პარტიის წევრების მიმართ უპასუხისმგებლო, დამამცირებელ და ავანტიურისტულ დამოკიდებულებას, რის გამოც ვტოვებ ჩემს გუნდთან ერთად აღნიშნულ პარტია“,-განაცხადა მან და ასევე აღნიშნა, რომ გარდა ამისა, პარტიის ხელმძღვანელობას გააჩნია საკმაოდ დიდი ფინანსური დავალიანება თანამშრომლების მიმართ.

როგორც ზურაბ პინაიშვილი აცხადებს, მან პარტიაში 180-მდე ადამიანი მიიყვანა და მათ უმრავლესობას მიღებული აქვს გადაწყვეტილება, პარტიის დატოვების შესახებ.

გუშინ ცნობილი გახდა, რომ ბათუმში "პაატა ბურჭულაძე - სახელმწიფო ხალხისთვის” ახალგაზრდული ორგანიზაციის ხელმძღვანელმა და ათობით აქტივისტმა დატოვა. პარტიის რიგები თბილისში, ისნის #10 საარჩევნო ოლქის აღმასრულებელმა მდივანმა, იოსებ ხიმშიაშვილმაც დატოვა.