მებაჟე-ოფიცრებმა 1 322 763 ლარის ღირებულების, 18 კგ-ზე მეტი ოქროს ზოდები აღმოაჩინეს. აღნიშნულ ინფორმაციას შემოსავლების სამსახური ავრცელებს.

"საბაჟო გამშვები პუნქტის „წითელი ხიდი“-ს კონტროლის ზონაში სხვადასხვა სინჯისა და წონის არადეკლარირებული ოქროს ზოდები (19 ცალი) საერთო წონით 18.6 კილოგრამი აღმოაჩინეს. შემოსავლების სამსახურის მებაჟე ოფიცრებმა უკანონო ტვირთი აზერბაიჯანის მოქალაქის, ა.ი-ს სატრანსპორტო საშუალების რენტგენო-სკანერზე გაშუქებისა და დეტალური დათვალიერების შედეგად გამოავლინეს. ოქროს სხმულები ავტომობილის უკანა სავრძლის საზურგესა და საბარგულს შორის არსებულ სპეციალურ სამალავში იქნა აღმოჩენილი. საქონლის საბაჟო ღირებულებამ 1 322 763 ლარი შეადგინა.

საქმე შემდგომი რეაგირების მიზნით გადაეცა ფინანსთა სამინისტროს საგამოძიებო სამსახურს", - აღნიშნულია შემოსავლების სამსახურის მიერ გავრცელებულ ინფორმაციაში.