“ქართული ოცნების” წევრი ზაქარია ქუცნაშვილი “სახელმწიფო ხალხისთვის”, ”გირჩის”, ”ახალი მემარჯვენეების” და ”ახალი საქართველოს” ერთ საარჩევნო ბლოკად გაერთიანების გადაწყვეტილებას ეხმაურება.

მისი შეფასებით, გამართლდა მოსაზრება იმის შესახებ, რომ პაატა ბურჭულაძის გუნდი სიმპატიურად იყო განწყობილი “ნაციონალური მოძრაობის“ მემკვიდრეობისადმი.

“ნაციონალური მოძრაობის“ მემკვიდრეობასთან პოლიტიკური ალიანსის შექმნით დადასტურდა ჩვენი მოსაზრების სისწორე, მაგრამ ეს მათი უფლება და მათი არჩევანია. ამასთან, ბუნებრივია, ის ადამიანები, ვისაც არ სჯეროდა, რომ პაატა ბურჭულაძე “ნაციონალური მოძრაობის“ მემკვიდრეობას შეეკვრებოდა, განაწყენებული არიან – საკუთარი თავის მოტყუება ბევრს არ სურს და პარტიის მიერ მიღებულ გადაწყვეტილებაზე მათი რეაქცია, სწორია. თუკი პაატა ბურჭულაძის მიზანი პროდასავლური ნიშნით გაერთიანება იყო, ამ შემთხვევაში არსებობს “რესპუბლიკური პარტია“, “თავისუფალი დემოკრატები“ და ინდივიდუალურად ბევრი სხვა ისეთი პილიტიკოსი, რომლის პროდასავლური ორიენტაცია ეჭვს არ იწვევს, მაგალითად, სალომე ზურაბიშვილი. ამის მიუხედავად, მან პოლიტიკური ალიანსი “ნაციონალური მოძრაობის“ მემკვიდრეობასთან გააფორმა, რითაც პარტია სერიოზულ ზიანს მიიღებს“, – აღნიშნა ქუცნაშვილმა.