ტყიბულისა და თერჯოლის გაერთიანებულ ოლქში „ნაციონალური მოძრაობის“ მაჟორიტარი დეპუტატობის კანდიდატის, ოთარ კახიძის განცხადებით, „პატრიოტთა ალიანსის“ ერთ-ერთი ლიდერი ირმა ინაშვილი პირდაპირ ეწევა ანტიდასავლურ პროპაგანდას და არის რუსეთის ფედერაციის ინტერესების გამტარებელი პოლიტიკური პარტიის წარმომადგენელი საქართველოში.

ამის შესახებ კახიძემ დღეს გამართულ ბრიფინგზე განაცხადა, რითაც ინაშვილის მოთხოვნას გამოეხმაურა, რომლის მიხედვითაც „ნაციონალური მოძრაობა“ უნდა აიკრძალოს.

ტყიბულისა და თერჯოლის გაერთიანებულ ოლქში „ნაციონალური მოძრაობის“ მაჟორიტარი დეპუტატობის კანდიდატის თქმით, „ინაშვილს და ივანიშვილს, რომლებიც ბედუკაძესთან ერთად ერთი პროექტის წარმომადგენლები არიან, ამომრჩეველი პასუხს 8 ოქტომბერს გასცემს“.

„ირმა ინაშვილი, რომელიც პირდაპირ იყო ჩართული ციხის კადრების დადგმაში, რომელსაც იგი თავად ადასტურებს, არავითარი მორალური უფლება არ აქვს ისაუბროს, რომელიღაც პარტიის აკრძალვაზე, ეს ადამიანი პირდაპირ ეწევა ანტიდასავლურ პროპაგანდას და არის რუსეთის ფედერაციის ინტერესების გამტარებელი პოლიტიკური პარტიის წარმომადგენელი საქართველოში. მე ვთვლი, რომ ირმა ინაშვილსაც და ბიძინა ივანიშვილსაც, რომლებიც ლადო ბედუკაძესთან ერთად ერთი პროექტის წარმომადგენლები არიან, 8 ოქტომბერს ქართველი ამომრჩეველი გასცემს პასუხს, რომელიც არჩევანს საქართველოს წინსვლის სასარგებლოდ გააკეთებს“, - აღნიშნა კახიძემ.