განათლებისა და მეცნიერების მინისტრი ალექსანდრე ჯეჯელავა გერმანულ-ამერიკული ორგანიზაცია GFK-ის მიერ ჩატარებული კვლევის შედეგებს მიზანმიმართულ მანიპულირებად აფასებს. ამის შესახებ მან ჟურნალისტებთან საუბრისას განაცხადა და აღნიშნა, რომ რეალობა GFK-ის კვლევის მიხედვით დასახელებული ციფრებისგან თვისებრივად განსხვავდება.

„ვაფასებ, როგორც მიზანმიმართულ მანიპულირებას რეიტინგებით. ეს არის კონკრეტული ხალხის სურვილები, ოცნებები გამოხატული ციფრებში. ვფიქრობ, რომ რეალობა თვისებრივად განსხვავდება დასახელებული ციფრებისგან. საერთაშორისო კვლევებს რაც შეეხება, ხშირ შემთხვევაში საერთაშორისო კვლევის უკან სავსებით კონკრეტული ხალხი დგას, რომლებსაც სავსებით კონკრეტული პოლიტიკური ინტერესები ამოძრავებს“, - განაცხადა ალექსანდრე ჯეჯელავამ.

გერმანულმა კომპანია GFK-მ კვლევა ტელეკომპანია „რუსთავი 2“-ის  დაკვეთით მიმდინარე წლის 2-დან 18 აგვისტოს ჩათვლით ჩაატარა და პირდაპირი ინტერვიუს წესით, მთელი საქართველოს მასშტაბით, 2 200 ადამიანი გამოკითხა. ცდომილების ზღვარი 2.1%-ია.

კვლევის მიხედვით, პოლიტიკური პარტიების რეიტინგები ასე გამოიყურება: "ქართული ოცნება" - 35.9%, "ნაციონალური მოძრაობა" - 34.2%, "პაატა ბურჭულაძე - სახელმწიფო ხალხისთვის" - 9.8%.

8 ოქტომბრის არჩევნებში „ქართულ ოცნებას“ ხმას გამოკითხულთა 25.8% მისცემდა, „ნაცმოძრაობას“- 25.5%, პაატა ბურჭულაძის პარტიას - 6.9%;

საპრეზიდენტო არჩევნებში გიორგი მარგველაშვილს ხმას GFK-ის გამოკითხულთა 10.5% მისცემდა, დავით ბაქრაძეს - 9.1%, მიხეილ სააკაშვილს - 6.9%, ირაკლი ალასანიას - 4.8%.