„ნებისმიერი სოციოლოგიური კვლევა და ჩვენი ყოველდღიური შეხვედრები ათასობით ამომრჩეველთან ერთმნიშვნელოვნად აჩვენებს, რომ „ქართული ოცნების“ კორუმპირებული, უპასუხისმგებლო ხელისუფლება, რომელმაც ძალიან ბევრი პრობლემა შეუქმნა მოქალაქეებს, არის დასრულებული“,-განაცხადა „ერთიანი ნაციონალურ მოძრაობის“ ერთ-ერთმა წევრმა, ირაკლი აბესაძემ.

აღნიშნულით ირაკლი აბესაძე გერმანულ-ამერიკული ორგანიზაციის, GFK-ის მიერ ჩატარებულ კვლევას ეხმაურება.

მისი თქმით, „ნაციონალური მოძრაობა“ ამ კვლევის შედეგებს ენდობა, რადგან თითქმის ყველა ავტორიტეტული საერთაშორისო ორგანიზაცია კვლევისას მსგავს შედეგს აჩვენებს.

„ადამიანები მზად არიან მხარი დაუჭირონ ჩვენს სამოქმედო გეგმას, რომელიც ითვალისწინებს ახალი სამუშაო ადგილების შექმნას, ეკონომიკის განვითარებას, პენსიების გაზრდას, ჯანდაცვის სიტემის სრულყოფას“,- განაცხადა ირაკლი აბესაძემ.

გერმანულმა კომპანია GFK-მ კვლევა ტელეკომპანია „რუსთავი 2“-ის  დაკვეთით მიმდინარე წლის 2-დან 18 აგვისტოს ჩათვლით ჩაატარა და პირდაპირი ინტერვიუს წესით, მთელი საქართველოს მასშტაბით, 2 200 ადამიანი გამოკითხა. ცდომილების ზღვარი 2.1%-ია.

კვლევის მიხედვით, პოლიტიკური პარტიების რეიტინგები ასე გამოიყურება: "ქართული ოცნება" - 35.9%, "ერთიანი ნაციონალური მოძრაობა" - 34.2%, "პაატა ბურჭულაძე - სახელმწიფო ხალხისთვის" - 9.8%.

8 ოქტომბრის არჩევნებში „ქართულ ოცნებას“ ხმას გამოკითხულთა 25.8% მისცემდა, „ნაცმოძრაობას“- 25.5%, პაატა ბურჭულაძეს პარტიას - 6.9%;

საპრეზიდენტო არჩევნებში გიორგი მარგველაშვილს ხმას GFK-ის გამოკითხულთა 10.5% მისცემდა, დავით ბაქრაძეს - 9.1%, მიხეილ სააკაშვილს - 6.9%, ირაკლი ალასანიას - 4.8%.