„კვლევა არის კვლევა. ყველა კვლევაში არის ჯანმრთელი აზრი. ასე რომ, თუ ადამიანი გონიერია, უნდა გამოიყენოს ეს კვლევა. ყველა კვლევას ვენდობით ჩვენ და არც ერთს არ ვეწინააღმდეგებით“, - განაცხადა მოძრაობის - „სახელმწიფო ხალხისთვის“ ლიდერმა, პაატა ბურჭულაძემ.

აღნიშნული განცხადებით ბურჭულაძე გერმანულ-ამერიკული ორგანიზაციის, GFK-ის მიერ ჩატარებულ კვლევას ეხმაურება.

ბურჭულაძის თქმით, ის ყველა კვლევას პასუხისმგებლობით ეკიდება, მოსწონს თუ არ მოსწონს.

როგორც მოძრაობის - „სახელმწიფო ხალხისთვის“ ლიდერმა აღნიშნა, კვლევებმა აჩვენა, რომ დღეს საქართველოში სამი უალტერნატივო პოლიტიკური ძალაა.

„უიმედობა არის ნომერ პირველი პრობლემა საქართველოში. მე პოლიტიკაში იმიტომ მოვედი, რომ ქვეყანაში უიმედობა მოისპოს. კვლევებმა გვაჩვენეს, რომ ხალხის 35% ხმას აძლევს უმუშევრობას და სიღარიბეს, 34% ხმას აძლევს შიშს. ჩვენ ის ძალა ვართ, რომელსაც შეუძლია და აუცილებლად მოსპობს საქართველოში უმუშევრობას, სიღარიბეს და შიშს. ასე რომ, გულს ნუ გაიტეხთ, 8 ოქტომბრიდან ყველაფერი უკეთესობისკენ შეიცვლება”, - განაცხადა პაატა ბურჭულაძემ.

გერმანულმა კომპანია GFK-მ კვლევა ტელეკომპანია „რუსთავი 2“-ის  დაკვეთით მიმდინარე წლის 2-დან 18 აგვისტოს ჩათვლით ჩაატარა და პირდაპირი ინტერვიუს წესით, მთელი საქართველოს მასშტაბით, 2 200 ადამიანი გამოკითხა. ცდომილების ზღვარი 2.1%-ია.

კვლევის მიხედვით, პოლიტიკური პარტიების რეიტინგები ასე გამოიყურება: "ქართული ოცნება" - 35.9%, "ერთიანი ნაციონალური მოძრაობა" - 34.2%, "პაატა ბურჭულაძე - სახელმწიფო ხალხისთვის" - 9.8%.

8 ოქტომბრის არჩევნებში „ქართულ ოცნებას“ ხმას გამოკითხულთა 25.8% მისცემდა, „ნაცმოძრაობას“- 25.5%, პაატა ბურჭულაძეს პარტიას - 6.9%;

საპრეზიდენტო არჩევნებში გიორგი მარგველაშვილს ხმას GFK-ის გამოკითხულთა 10.5% მისცემდა, დავით ბაქრაძეს - 9.1%, მიხეილ სააკაშვილს - 6.9%, ირაკლი ალასანიას - 4.8%.