„ქართული ოცნება“ ელემენტარული პოლიტიკური კატეგორიებით ვერ აზროვნებს, „ქართული ოცნება“ ელემენტარულ გადაწყვეტილებებს ვერ იღებს და ადეკვატურად ვერ მოქმედებს არც თუ ისე რთულ სიტუაციებში“,-განაცხადა „დემოკრატიული მოძრაობის“ ლიდერმა, ნინო ბურჯანაძემ.

აღნიშნულით ნინო ბურჯანაძე პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებას ეხმაურება და მას ურჩევს, ჩაიხედოს საერთაშორისო სამართლის სახელმძღვანელოებში და სანამ საჯარო განცხადებას გააკეთებს, ჯერ განმარტება წაიკითხოს „უბლოკო სტატუსსა“ და ნეიტრალიტეტზე.

„ბატონო ირაკლი და უმრავლესობის წევერებო! ვინ გიშლიდათ, რომ „რესპუბლიკური პარტიისთვის“ დაგესწროთ და თქვენ გამოხმაურებოდით „უბლოკო სტატუსის“ იდეას. ინიციატივა ჩვენ განვაცხადეთ ივლისის დასაწყისში, „რესპუბლიკური პარტია“ ამ იდეას გამოეხმაურა პრაქტიკულად ერთი თვის შემდეგ, თქვენ ვინ გიშლიდათ ერთი თვის განმავლობაში ხელს?! კარგი იქნება, თუ თავს დაანებებთ უსინდისო მანიპულაციებს, არაკომპეტენტურობა ერთია, მაგრამ როდესაც არაკომპეტენტურობიდან გამომდინარე უსინდისო ბრალდებები ისმის, ეს უკვე სასაცილოც არის, მაგრამ რეაგირებას ნამდვილად საჭიროებს. ესეც ერთი დადასტურება იყო იმისა, რომ „ქართული ოცნება“ ელემენტარული პოლიტიკური კატეგორიებით ვერ აზროვნებს, „ქართული ოცნება“ ელემენტარულ გადაწყვეტილებებს ვერ იღებს და ადეკვატურად ვერ მოქმედებს არც თუ ისე რთულ სიტუაციებში“, - ამბობს ნინო ბურჯანაძე.

როგორც ირაკლი სესიაშვილმა განაცხადა, „უბლოკო სტატუსი“ ნიშნავს  ოკუპაციის დაკანონებას".

„უბლოკო სტატუსი“ ნიშნავს  ჩვენი ქვეყნის, ჩვენი ტერიტორიის ბუფერულ ზონად გადაქცევას და ზუსტად იმას, რასაც ჰქვია კრემლის ინტერესების გატარება. არ მიკვირს, რომ ბურჯანაძე ამ ინიციატივას აყენებს, იმიტომ, რომ ის ცდილობს პრორუსული ნიშა დაიკავოს“, - განაცხადა ირაკლი სესიაშვილმა.

საინიციატივო ჯგუფს, რომლის შემადგენლობაშიც არიან ნინო ბურჯანაძე, ბაკურ ბაკურაძე, გიორგი ახვლედიანი, დიმიტრი ლორთქიფანიძე, გრიგოლ ბარამიძე და სხვები, მზად აქვს კონსტიტუციაში შესატანი ცვლილებების პროექტი, რომლის მიხედვით, საქართველოს კონსტიტუციისთვის შემდეგი პუნქტის დამატებას ითხოვენ: „ტერიტორიული მთლიანობის აღდგენის და დაცვის, თავდაცვისა და უსაფრთხოების მიზნებიდან გამომდინარე, საქართველო არ გაწევრიანდება რომელიმე საერთაშორისო სამხედრო ბლოკში, ან ალიანსში. დაუშვებელია საქართველოს ტერიტორიაზე რომელიმე სამხედრო ბლოკის, ალიანსის, ან ნებისმიერი სხვა სახელმწიფოს სამხედრო შენაერთების განთავსება. უბლოკო სტატუსი მოქმედებს 1991 წლის მდგომარეობით აღიარებულ საქართველოს ტერიტორიულ საზღვრებში“.