20-21-22 აგვისტოს, სასტუმრო „წყალტუბო სპა-რეზონში“ ორგანიზაცია „ადამიანი გაჭირვებაში“ PIN-ის მიერ ორგანიზებული იყო ტრენინგი ხონისა და ტყიბულის მუნიციპალიტეტების მრჩეველთა საბჭოებისათვის. სამუშაო საქართველოს სტრატეგიული კვლევებისა და განვითარების ცენტრმა განახორციელა.

როგორც Guardian.ge–ს ხონის მუნიციპალიტეტიდან აცნობეს, ტრენინგის მიზანი იყო მრჩეველთა საბჭოს წევრებისათვის სტრატეგიული დაგეგმარების უნარების გაღრმავება; ადგილობრივი სოციალური პოლიტიკის სტრატეგიული მიმართულებებისა და ამოცანების, სოციალური პოლიტიკის განვითარების კუთხით არსებული გამოცდილების, გამოწვევების განსაზღვრა ადგილობრივი სოციალური ჩართულობის სტრატეგიის დოკუმენტის შესაქმნელად.

ინფორმაციისთვის: PIN პროექტი „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ დაფინანსებულია ევროკავშირის და ჩეხეთის საგარეო საქმეთა სამინისტროს მიერ. მისი მიზანია თანამშრომლობის გაღრმავება და გაძლიერება საჯარო და სამოქალაქო სექტორს შორის, სოციალური ჩართულობის საკითხზე ორწლიანი სტრატეგიის შემუშავება და ოთხ მუნიციპალიტეტში არასამთავრობო ორგანიზაციებთან ერთად PIN-ის სოციალური ინტეგრაციის მოდელის დანერგვა.