ავღანეთის დედაქალაქ ქაბულში ამერიკული უნივერსიტეტის კამპუსში უცხოელი თანამშრომლები, მათ შორის პროფესორები და ათეულობით სტუდენტი იყო გამომწყვდეული ოთხშაბათს, მას შემდეგ, რაც კამპუსს ეჭვმიტანილი მებრძოლები ასაფეთქებელი მოწყობილობებითა და ცეცხლსასროლი იარაღით დაესხნენ თავს. აღნიშნულ ინფორმაციას „როიტერსი“ ავღანეთის მთავრობის მაღალი თანამდებობის პირზე დაყრდნობით ავრცელებს.

BBC -ის ცნობით, მოკლულია სულ მცირე 13 ადამიანი, მათ შორის 7 სტუდენტი. 

ზოგიერთი სტუდენტი შენობის მეორე სართულის ფანჯრებიდან გადახტა, რათა გაქცეოდნენ თავდამსხმელებს. ერთ-ერთი სტუდენტის ინფორმაციით, ზოგიერთმა მათგანმა ფეხი მოიტეხა, ზოგმა კი დაზიანებები თავის არეში მიიღო. 

შინაგან საქმეთა სამინისტროს მაღალჩინოსანმა თქვა, რომ ელიტურმა ავღანურმა ძალებმა უნივერსიტეტის შენობას ალყა შემოარტყეს, ადგილობრივი დროით საღამოს 6:30 საათზე იერიშის დაწყების შემდეგ კი სროლები ერთ საათზე მეტ ხანს გაგრძელდა.

თვითმხილველთა თქმით, მას შემდეგ სროლები შეწყდა და სპეციალური ძალები შენობაში შევიდნენ.

თავდაპირველად მსხვერპლის შესახებ ზედაპირული ინფორმაცია ვრცელდებოდა. პირველად ავღანეთის დედაქალაქის საავადმყოფოების გაერთიანების ხელმძღვანელმა, მუჰამედ სალიმ რასოულიმ დაუდასტურა „როიტერსს“, რომ სულ მცირე 1 სტუდენტი იყო მოკლული, 14 კი დაჭრილი.

თავდასხმაზე ჯერ არც ერთ დაჯგუფებას არ აუღია პასუხისმგებლობა.

ოფიციოზის ცნობით, ადრე გავრცელებული ინფორმაციის თანახმად, თავდასხმაში ჩართული იყო რამდენიმე შეიარაღებული მამაკაცი, რომელთაგან ზოგს თვითმკვლელი ქამარი ეკეთა.