„2008 წლის ივლისში, საქართველოში ჩამოვიდა ბატონი გრიგორი კარასინი იმ მიზნით, რომ გაეფრთხილებინა საქართველოს მხარე ცხინავლის რეგიონში არსებულ დაძაბულობაზე და მოუწოდა, ფრთხილად ყოფილიყო ჩვენი მხარე, ომი არ დაეწყო და ქვეყანა არ დაექცია", - აღნიშნული განცხადება "დემოკრატიული მოძრაობის" ლიდერმა, ნინო ბურჯანაძემ გუშინ "კავკასიის" ეთერში გააკეთა.

„2008 წლის ივლისში, საქართველოში ჩამოვიდა ბატონი გრიგორი კარასინი, შეხვდა საქართველოს მაშინდელ პრეზიდენტს, საქართველოს საგარეო საქმეთა მინისტრს გრიგოლ ვაშაძეს. ჩამოვიდა იმ მიზნით, რომ გაეფრთხილებინა საქართველოს მხარე ცხინავლის რეგიონში არსებულ დაძაბულობაზე და მოუწოდა, ფრთხილად ყოფილიყო ჩვენი მხარე, ომი არ დაეწყო და ქვეყანა არ დაექცია. მიუხედავად იმისა, რომ მე უკვე წამოსული ვიყავი თანამდებობიდან და არ ვაპირებდი ხელისუფლების საქმეებში ჩარევას, მაშინდელი საგარეო საქმეთა მინისტრის გრიგოლ ვაშაძის თხოვნით, შევხვდი ბატონ კარასინს. კარასინმა განმიცხადა, რომ დარჩა შთაბეჭდილება, რომ მიხეილ სააკაშვილმა კარგად ვერ გაიგო მათი შეხვედრის მნიშვნელობა და მისი თხოვნის შინაარსი საქართელოს ხელისუფლებისადმი.

მან პირადად მეც მითხრა, რომ რუსეთის ხელისუფლების დაბეჯითი თხოვნაა - ნუ დააქცევდა ქვეყანას ჩვენი ხელისუფლება და არ დაეწყო ომი ცხინვალის რეგიონში. ამ შეხვედრის შემდეგ მე დავურეკე ვაშაძეს, დავურეკე სააკაშვილს და გავფრთხილე, რომ ეს იყო ძალიან სერიოზული გზავნილი და უნდა ვყოფილიყავით ძალიან ფრთხილად“, - განაცხადა ნინო ბურჯანაძემ და დაამატა, რომ არც წინა ხელისუფლებას შეეძლო ქვეყნის ინტერესების სასარგებლოდ გადაწყვეტილების მიღება და არც დღევანდელს შეუძლია. აქედან გამომდინარე ბურჯანაძე მიიჩნევს, რომ მხოლოდ მისი პოლიტიკური ძალა მოუტანს ქვეყანას კეთილდღეობას.