წლის ბოლოს ლენტეხში ახალი კლინიკა ამოქმედდება - სამშენებლო სამუშაოები დღეს საქართველოს პრემიერ-მინისტრმა, გიორგი კვირიკაშვილმა, შრომის, ჯანმრთელობის და სოციალური დაცვის მინისტრ დავით სერგეენკოსთან ერთად დაათვალიერა.

მთავრობის ადმინისტრაციის ცნობით, საავადმყოფო, რომლის მშენებლობაზეც 3 მილიონამდე ლარი დაიხარჯა, მოსახლეობას ყველა სახის გადაუდებელ სამედიცინო მომსახურებას გაუწევს.

ჯანდაცვის მინისტრის განმარტებით, კლინიკაში ძირითადად ადგილობრივი სამედიცინო პერსონალი დასაქმდება, რომელთაც უკვე ჩაუტარდათ ტრენინგები და კლინიკის ამოქმედებამდე თითოეული მათგანი გაივლის სპეციალურ გადამზადებას.

როგორც მთავრობის ადმინისტრაციის პრესსამსახურის გავრცელებულ ინფორმაციაშია აღნიშნული, ლენტეხის კლინიკა ჩართულია ჯანდაცვის საყოველთაო პროგრამაში, რაც იმას ნიშნავს, რომ ამ პროგრამით მოსარგებლე ლენტეხელებს შესაძლებლობა ექნებათ, უფასოდ მიიღონ, როგორც გეგმიური და გადაუდებელი ამბულატორიული, ასევე სხვადასხვა პროფილის სტაციონარული მომსახურება.

ლენტეხში ახალი კლინიკის სამშენებლო სამუშაოების დათვალიერებამდე, გიორგი კვირიკაშვილი ლენტეხში მოსახლეობას შეხვდა, სადაც რაჭა-ლეჩხუმისა და ქვემო და ზემო სვანეთის გაერთიანებული საარჩევნო ოლქების მაჟორიტარი დეპუტატობის კანდიდატი გოჩა ენუქიძე წარადგინა და ლენტეხში მშენებარე კლინიკაზეც ისაუბრა.

პრემიერის თქმით, ლენტეხის ახალი კლინიკა დიდი შვება იქნება ადგილობრივებისთვის.

„ლენტეხში მალე დასრულდება ყველაზე თანამედროვე სტანდარტებით აღჭურვილი საავადმყოფოს მშენებლობა. ეს იქნება დიდი შვება ადგილობრივებისთვის და ეს ყველაფერი, მთის კანონთან ერთად, შექმნის წინაპირობას, რომ აქ დამაგრდეს მოსახლეობა და ახალგაზრდობა რეგიონის დატოვებაზე აღარ ფიქრობდეს“, - განაცხადა პრემიერ მინისტრმა.