თურქეთის ავიაიერიშებს სირიაში სულ მცირე 25 ადამიანი ემსხვერპლა. დარტყმები ავიაციამ ქალაქ ჯარაბლუსის მახლობლად განახორციელა. თურქეთის სამხედრო მაღალჩინოსნების ცნობით, დაღუპულები არიან ქურთი მებრძოლები.

პარალელურად კი უფლებადამცველები ირწმუნებიან, რომ თურქეთის იერიშებს სირიის ჩრდილოეთ რეგიონებში 35 მშვიდობიანი მოქალაქე და მხოლოდ 4 მებრძოლი ემსხვერპლა.

მიმდინარე წლის 22 აგვისტოს, თურქეთმა ჩრდილოეთ სირიაში ე.წ. ისლამური სახელმწიფოს სამიზნეები დაბომბა. არტილერიამ, რომელიც თურქეთის შიგნით არის განლაგებული, ცეცხლი გაუხსნა „ისლამურ სახელმწიფოს“ და ასევე ქურთული მილიციის სამიზნეებს ქალაქებში - ჯარაბლუსა და მანბიჯში. თურქეთის საგარეო საქმეთა მინისტრმა, მევლუთ ჩავუშოღლუმ განაცხადა, რომ ჩრდილოეთ სირია „სრულად უნდა გაიწმინდოს“ „ისლამური სახელმწიფოსაგან“. აღნიშნული იერიში „ისლამურ სახელმწიფოზე“, გაზიანტეპში, შაბათს, 20 აგვისტოს, ქურთების ქორწილში თვითმკვლელის მიერ ბომბის აფეთქებას მოჰყვა, რა დროსაც 54 ადამიანი, უმეტესად ბავშვები დაიღუპნენ.