თურქეთის არმია და მისი მოკავშირეები სირიაში უფრო ღრმად შევიდნენ და დაიკავეს ტერიტორია, რომელსაც უწინ ქურთების მოკავშირე ძალები აკონტროლებდნენ. ახალი ამბების სააგენტო "როიტერსის" ცნობით, თურქეთის მიერ სამხედრო კამპანიის დაწყებიდან მე-5 დღის თავზე, სოფლის 35 მცხოვრებია მოკლული.

თურქეთის ოფიციოზის განცხადებით, საჰაერო დარტყმებისას 35 ქურთი მებრძოლია მოკლული. ანკარამ მსხვერპლთა შორის სამოქალაქო პირების არსებობის შესახებ გავრცელებული ინფორმაცია უარყო.

თურქეთმა, რომელიც ქურთ მეამბოხეებს მისსავე ტერიტორიაზეც ებრძვის, სირიაში ტანკები და ჯარები ოთხშაბათს, 24 აგვისტოს სირიელ მეამბოხეთა მოკავშირეების მხარდასაჭერად გაგზავნა.

თურქეთის მიერ მხარდაჭერილმა ძალებმა პირველად სირიის სასაზღვრო ქალაქი ჯერაბლუსი დაიკავეს და ის "ისლამური სახელმწიფოს" მებრძოლებისგან გაწმინდეს. შემდეგ კი სვლა სამხრეთის მიმართულებით განაგრძეს იმ ტერიტორიებისკენ, სადაც ქურთი მოკავშირეების მებრძოლები იყვნენ განლაგებულნი.

თურქულმა ჯარებმა ასევე დასავლეთით, "ისლამური სახელმწიფოს" მიერ დაკავებული ტერიტორიებისკენაც წაიწიეს.