„ეს თმაგაპუწული, ფაჩუჩებიანი და გოგლი-მოგლი ბიჭი რომ გამოდის ახლა და ყვება რაღაცებს, თითქოს ჩვენ არაფერს ვაკეთებდით და ის იყო ქართული პროტესტის მედროშე, გამოვიდეს და მოყვეს თვითონ სად იყო 2012 წლამდე, რას აპროტესტებდა“,- ამბობს თბილისის საკრებულოს დამოუკიდებელი დეპუტატი, ალეკო ელისაშვილი, რითაც „ქართული ოცნების“ აღმასრულებელი მდივნის, ირაკლი კობახიძის განცხადებას ეხმაურება.

ელისაშვილი კობახიძისგან ან „ქართული ოცნების“ სხვა ლიდერებისგან მისთვის და მისი მეგობრებისთვის ბოდიშის მოხდას ითხოვს.

„2012 წლის ოქტომბრის ბოლოს რომ გახდნენ ყველანი დევგმირები და ლომები, ველოდები პასუხს და თუ ბოდიში არ იქნება, შემდეგ ნუ დამაბრალებენ, რომ არაკორექტული ვარ და თავს ვერ ვიკავებ. მოგვიხადოს საჯარო ბოდიში მე და ჩემს მეგობრებს, რომლებთან ერთადაც წლების განმავლობაში ქუჩა-ქუჩა დავდიოდი და ვმართავდი აქციებს იმელის, მირზა შაფის დასაცავად, ვაკის პარკში ხეების მოჭრის წინააღმდეგ. კობახიძის განცხადება იყო არა მხოლოდ ჩემი, არამედ იმ ასეულობით ადამიანის შეურაცხყოფა, ვისაც ეშინოდა „ნაციონალების“ დროს, მაგრამ შიშს ებრძოდა, გამოდიოდა ქუჩაში და კობახიძესავით გულგრილი არ იყო“, - განაცხადა ალეკო ელისაშვილმა და ირაკლი კობახიძეს მიმართა გადახედოს არქივს, ცირა და ალეკო ელისაშვილების აქტივობის შესახებ.

ალეკო ელისაშვილის თქმით, როგორც ბევრს ჰგონია ირაკლი კობახიძე პატარა, მიამიტი ბიჭი არ არის, ის 38 წლისაა და უნდა მიბაძოს დავით ნარმანიას რამდენიმე საათში ბოდიშის მოხდით.

„ირაკლი კობახიძე ამ თავისი ვარცხნილობით ნამდვილად არ გვახსოვს“, - აღნიშნა ელისაშვილმა.

იმ შემთხვევაში, თუკი ირაკლი კობახიძე ბოდიშს არ მოიხდის, ელისაშვილი „ქართული ოცნების“ სხვა ლიდერებისგან ელოდება ამ ნაბიჯს.

„ქართული ოცნების“ აღმასრულებელ მდივან ირაკლი კობახიძის განცხადებით, ქალაქის იერსახესა და გამწვანებაზე ალეკო ელისაშვილის ასეთი აქტიურობა 2012 წლამდე არ ახსოვს.