„ჩვენ გვაქვს გეგმა, ერთ მილიონ ადამიანს, ვინც სოციალურად დაუცველია, 4 წლის განმავლობაში, სადაც არ უნდა იმუშაოს, არ მოვუხსნით ამ სტატუსს“, - განაცხადა  მოძრაობის - „სახელმწიფო ხალხისთვის“ ლიდერმა, პაატა ბურჭულაძემ განმუხურში, სადაც დასავლეთ საქართველოში მაჟორიტარობის კანდიდატები წარადგინა.

ბურჭულაძის განმარტებით, დღეს სოციალური დახმარება 500 000 ადამიანს ეძლევა და მისი პარტიის ხელისუფლებაში მოსვლის შემთხვევაში, სოციალურად დაუცველის სტატუსის მატარებელთა რაოდენობა მილიონამდე გაიზრდება.

გარდა ამისა, როგორც პაატა ბურჭულაძემ აღნიშნა, ყველა ვინც კი ცხოვრობს ასეთ ოჯახებში, იქნება დაპურებული, ექნება უფასო ჯანდაცვა, უფასო მედიკამენტები და უფასო სწავლა.

„გუშინ უკვე შეიძლებოდა, რომ პენსიონერი ასეთი გაჭირვებული არ ყოფილიყო. შეიძლებოდა, რომ ბიუჯეტის სწორად გადანაწილების შემთხვევაში პენსიონერს ჰქონოდა 250 ლარი. უკვე გუშინ შეიძლებოდა, რომ სოციალურად დაუცველ ოჯახებს ნორმალურად ეცხოვრათ. დღეს სოციალური დახმარება 500 000 ადამიანს ეძლევა. ჩვენ გვაქვს გეგმა, რომ ბიუჯეტით, რაც დღეს არის, გავხდით ერთ მილიონს - ერთ მილიონ ადამიანს, ვინც სოციალურად დაუცველია, 4 წლის განმავლობაში, სადაც არ უნდა იმუშაოს, არ მოვუხსნით ამ სტატუსს და ყველანაირად ხელს შევუწყობთ, რომ მისი ოჯახი ფეხზე დადგეს. გარდა ამისა, ყველა ვინც კი ცხოვრობს ასეთ ოჯახებში, ყველა ადამიანი იქნება დაპურებული, ექნება უფასო ჯანდაცვა, უფასო მედიკამენტები, უფასო სწავლა“,-თქვა მან.

პაატა ბურჭულაძის თქმითვე, მორჩა დრო, როდესაც ხალხი უნდა ემსახუროს ჩინოვნიკებს.

„ჩინოვნიკები პირიქით უნდა იყვნენ ხალხის სამსახურში. შეიქმნება სახელმწიფო ხალხისთვის“, - განაცხადა ბურჭულაძემ.