ვიცე პრემიერის, ენერგეტიკის მინისტრის, კახა კალაძის შეფასებით, სოციალური დახმარების ბენეფიციართა რაოდენობის მილიონამდე გაზრდის თაობაზე მოძრაობის - „სახელმწიფო ხალხისთვის“ ლიდერის პაატა ბურჭულაძის განცხადება არასერიოზულია.

ამის შესახებ კალაძემ ჟურნალისტებთან საუბრისას განაცხადა.

„არ ვიცი, რამდენად სერიოზულად უნდა ვუპასუხო ამ კითხვას, თავს შევიკავებდი, რადგან არასერიოზული განცხადება იყო იმასთან დაკავშირებით, რომ დღეს გვყავს 500 000 სოციალურად დაუცველი და პაატას პარტია ამას მილიონამდე გაზრდის. არ ვიცი, რა მექანიზმებით აპირებს, გამიჭირდება ამაზე საუბარი“, - განაცხადა კალაძემ.

როგორც გუშინ განმუხურში, დასავლეთ საქართველოში მაჟორიტარობის კანდიდატები წარადგენისას,  მოძრაობის - „სახელმწიფო ხალხისთვის“ ლიდერმა, პაატა ბურჭულაძემ განაცხადა, დღეს სოციალური დახმარება 500 000 ადამიანს ეძლევა და მისი პარტიის ხელისუფლებაში მოსვლის შემთხვევაში, სოციალურად დაუცველის სტატუსის მატარებელთა რაოდენობა მილიონამდე გაიზრდება.

„დღეს სოციალური დახმარება 500 000 ადამიანს ეძლევა. ჩვენ გვაქვს გეგმა, რომ ბიუჯეტით, რაც დღეს არის, გავხდით ერთ მილიონს - ერთ მილიონ ადამიანს, ვინც სოციალურად დაუცველია, 4 წლის განმავლობაში, სადაც არ უნდა იმუშაოს, არ მოვუხსნით ამ სტატუსს და ყველანაირად ხელს შევუწყობთ, რომ მისი ოჯახი ფეხზე დადგეს“,-განაცხადა ბურჭულაძემ.