რეგიონული განვითარებისა და ინფრასტრუქტურის სამინისტროში ცალკეული პირების თანამდებობიდან გათავისუფლების პროცესი მიმდინარეობს, თუმცა საკადრო ცვლილებებზე საუბრი არასწორია, – ამის შესახებ მინისტრის მოადგილემ თენგიზ შერგელაშვილმა „მაესტროს ცხრიანში“ ჩართვისას განაცხადა.

„სამინისტროში მოადგილეების დამატება და ცალკეული მოადგილეებისთვის უფლებამოსილების შეწყვეტა მიმდინარეობს, თუმცა, საუბარი საკადრო ცვლილებებზე არასწორია“, – განაცხადა შერგელაშვილმა.

შეგახენებთ, რომ პრემიერ-მინისტრის, ირაკლი ღარიბაშვილის ბრძანებით რეგიონული განვითარებისა და ინფრასტრუქტურის მინისტრის ერთ-ერთი მოადგილე, გიორგი კობერიძე თანამდებობიდან უკვე გათავისუფლდა.

კობერიძე აღნიშნულ პოსტზე, გასული წლის ზაფხულში შავლიაშვილის მინისტრად დანიშვნიდან მალევე იქნა წარდგენილი. იგი მანამდე გაერთიანებული წყალმომარაგების კომპანიაში მაღალ თანამდებობაზე მუშაობდა. კობერიძის მინისტრის მოადგილედ დანიშვნის ინიაციატორი დავით შავლიაშვილი იყო. ჯერჯერობით არ ვრცელდება ინფორმაცია იმის თაობაზე უკავშირდება თუ არა გიორგი კობერიძის თანამდებობიდან გათავისუფლება რეგიონული განვითარებისა და ინფრასტრუქტურის სამინისტროს 100 %-იანი წილობრივ მფლობელობაში მყოფი შპს "საქართველოს გაერთიანებული წყალმომარაგების კომპანიის" 2013-2014 წლების ფინანსური და ბუღალტრული ანგარიშების ირგვლივ მიმდინარე გამოძიებას, რომლის ფარგლებშიც წყალმომარაგების კომპანიის ფინანსური სამსახურის ყოფილ უფროსს თამარ ფხოველიშვილს რამდენიმე დღის წინათ დაუსწრებლად წარედგინა ბრალი, მისი მეუღლე კი დააპატიმრეს.

გამოძიების მასალების მიხედვით, თამარ ფხოველიშვილმა და ზურაბ ნუცუბიძემ, განზრახვის შესაბამისად, 2013 წლის 31 მარტიდან 2014 წლის 31 დეკემბრამდე პერიოდში შპს „საქართველოს გაერთიანებული წყალმომარაგების კომპანიის“ ანგარიშიდან მათ კონტროლირებად ანგარიშებზე, თითქოსდა წყალმომარაგების კომპანიისათვის გაწეული მომსახურების სანაცვლოდ, საერთო ჯამში - 2 227 887 ლარი უკანონოდ გადარიცხეს და მიითვისეს.