„დედაქალაქის მერის საქმიანობა რომ შევაფასოთ, უნდა ვნახოთ, რა გაკეთდა ქალაქში. რაც ბოლოს მოხდა, გამოაჩინა, რომ ნარმანიას საზოგადოებასთან კომუნიკაციის პრობლემა გაუჩნდა“,- განაცხადა ყოფილმა პრემიერ მინისტრმა, ბიძინა ივანიშვილმა აჭარაში, ადგილობრივ მედიასთან შეხვედრისას.

მისი თქმით, დავით ნარმანიას მერობის დროს თბილისში ყველაფერი გაცილებით მეტი შენდება, ვიდრე „ნაციონალური მოძრაობის“ მმართველობის დროს.

„სხვა დანარჩენ შეფასებას რაც შეეხება, უნდა ნახოთ როგორი ქალაქი ჩაიბარა ნარმანიამ და როგორია ახლა. იქაც იმავეს ამბობენ, ქალაქი გაჩერდაო, მაგრამ ამ დროს ციფრებს თუ შევხედავთ ყველაფერი პირიქითაა, ყველაფერი გაცილებით მეტი შენდება, ვიდრე „ნაციონალური მოძრაობის“ მმართველობის დროს“, - განაცხადა ივანიშვილმა.

ყოფილმა პრემიერმა ასევე აღნიშნა, რომ მას არ მოეწონა, არასამთავრობო ორგანიზაციის წარმომადგენელს „მაიმუნო ვირიშვილოთი“ რომ მიმართა.

„შეიძლება ამ მხრივ ცოტა პრობლემა არის და შეიძლება კითხვები იყოს, მაგრამ მთავარია სტანდარტი, რომ ხელისუფლება სათავისოდ არ გამოიყენოს, გამჭვირვალე იყოს მმართველობა და ამ მხრივ პრობლემები არ არის, ხოლო მენეჯმენტი როგორია, ამაზე შეიძლება კითხვები არსებობდეს”, - აღნიშნა ყოფილმა პრემიერმა.