„ნაციონალური მოძრაობის“ ინიციატივას მთავრობის ეკონომიკური გუნდის უმაღლეს საკანონმდებლო ორგანოში დაბარებასთან დაკავშირებით მხარს უჭერენ „რესპუბლიკელები“.

როგორც „რესპუბლიკლების“ ერთ-ერთმა ლიდერმა ლევან ბერძენიშვილმა განაცხადა, ასეთ რთულ პირობებში, ამ ინიციატივას ალბათ ყველა დეპუტატი მხარს დაუჭერს, თუმცა აღნიშნა, რომ კვირის ბოლო საუკეთესო დრო არ უნდა იყოს მთავრობის წევრებისთვის პარლამენტის ქუთაისის შენობაში მისასვლელად.

მთავრობის ეკონომიკურ გუნდის პარლამენტში დაბარების საკითხი საპარლამენტო უმცირესობის ლიდერმა, დავით ბაქრაძემ ლარის კურსის ვარდნის გამო დააყენა.

„ჩვენ მიგვაჩნია, რომ ლარის სტაბილურობისა და ეკონომიკური კრიზისიდან გამოყვანის თემა არის, უმნიშვნელოვანესი, რითაც ქვეყანაში ხელისუფლება უნდა იყოს დაკავებული, ისევე როგორც ოპოზიცია. სამწუხაროდ, დღეს ჩვენ ვერ ვხედავთ, მთავრობის მხრიდან ადეკვატურ რეაქციას საკითხის მიმართ. ამიტომ ჩვენი შეთავაზებაა, საპარლამენტო უმრავლესობის მხრიდან დღეს, დღის განმავლობაში, ნებისმიერ დროს დავსხდეთ ერთად და ვისაუბროთ იმაზე, თუ რა ნაბიჯები უნდა გადაიდგას ქართულ ეკონომიკაში ამ პრობლემის მოსაგვარებლად“, – განაცხადა საპარლამენტო უმცირესობის ლიდერმა, დავით ბაქრაძემ.