ქალაქ მცხეთისა და თემის საკრებულოს რამდენიმე წევრი „ქართული ოცნების“ მაჟორიტარობის კანდიდატს, დიმიტრი ხუნდაძეს ემიჯნება, თუმცა მხარს უჭერს „ქართულ ოცნებას“.

ამის შესახებ მათ დღეს მცხეთაში ერთობლივი ბრიფინგი გამართეს.

გადაწყვეტილება საზოგადოებას მცხეთის მუნიციპალიტეტის საკრებულოს წევრმა, გურამ ანსიანმა გააცნო.

როგორც გურამ ანსიანმა ბრიფინგზე განაცხადა, ისინი არჩევნებში მხარდაჭერას მცხეთის მაჟორიტარი დეპუტატობის დამოუკიდებელ კანდიდატს, ცეზარ ჩოჩელს უცხადებენ, რადგან დიმიტრი ხუნდაძემ დესტრუქციული როლი ითამაშა თვითმმართველობის საქმიანობაში. 

„მიზეზი, რამაც გადაგვაწვეტინა გაერთიანება ცეზარ ჩოჩელის გარშემო, არის მხოლოდ მისი წარსულის საქმიანობა მცხეთის რაიონში და უპირატესი ხედვები მის მომავალზე. აქ მდგომნი ნდობას ვუცხადებთ დამოუკიდებელ კანდიდატს ცეზარ ჩოჩელს, როგორც სიტყვისა და საქმის ადამიანს.

გავრცელებული აზრი, თითქოს, ჩვენ ვემიჯნებით „ქართულ ოცნებას“ სიმართლეს არ შეესაბამება. ვემიჯნებით არა „ქართულ ოცნებას“, არამედ კანიდიდატ დიმიტრი ხუნდაძეს, ვინაიდან მიგვაჩნია, რომ მან დესტრუქციული როლი ითამაშა თვითმმართველობის საქმიანობაში.

მე, როგორც ერთ-ერთი რიგით ამომრჩეველი და ჩემი მეგობრები, რომლებიც არ მიეკუთვნებიან სხვა რომელიმე პარტიას, მხარს ვუჭერთ „ქართულ ოცნებას“, - განაცხადა ანსიანმა.