„გამიჭირდება იმაზე საუბარი, თუ რამდენი პარტია შევა პარლამენტში, თუმცა ჩვენ ვისურვებდით, რომ პარლამენტში იყოს სხვადასხვა პარტიები წარმოდგენილი, თუმცა ყველა კვლევა, რომელიც იყო დღემდე ჩატარებული, აჩვენებს იმას, რომ ამის შესაძლებლობა ნაკლებად აქვთ პარტიებს“,- განაცხადა ვიცე პრემიერმა, ენერგეტიკის მინისტრმა, კახა კალაძემ ჟურნალისტებთან საუბრისას.

ენერგეტიკის მინისტრმა პოლიტიკოსებს მოუწოდა, რომ იაქტიურონ, რადგან ზოგადად დემოკრატიული კუთხით ეს იქნება ძალიან კარგი და მნიშვნელოვანი, რომ საქართველოს ჰყავდეს მრავალპარტიული პარლამენტი.

„დააკვირდით კვლევებს და ამას ჩვენი შიდა კვლევებიც აჩვენებს, რომ ავიღოთ თუნდაც სხვა პარტიის, მაგალითად „ნაციონალური მოძრაობის“ მხარდამჭერების გარკვეული ნაწილი ფიქრობს, რომ არჩევნებში გაიმარჯვებს „ქართული ოცნება“. ახალი „ნაციონალური მოძრაობის“ მხარდამჭერების ძალიან დიდი ნაწილი ფიქრობს, რომ გაიმარჯვებს „ქართული ოცნება“. ამიტომ მე ვფიქრობ, რომ ერთადერთი რეალური ძალა, ვინც მიაღწევს წარმატებას და დიდი უმრავლესობით შევა პარლამენტში, ეს არის „ქართული ოცნება“, - განაცხადა კახა კალაძემ.