"კანონით დადგენილი ვადებით, ბოლო დღემდე მე ვიქნები მინისტრი", - ამის შესახებ სოფლის მეურნეობის მინისტრმა, ოთარ დანელიამ იმ კითხვის საპასუხოდ განაცხადა, თუ როდის დატოვებს ის ოფიციალურად თანამდებობას.

როგორც დანელიამ აღნიშნა, მას აქვს კონკრეტული ვადა, რა ვადაშიც უნდა დატოვოს პოსტი.

რაც შეეხება მინისტრის შემცვლელს, როგორც ოთარ დანელიამ აღნიშნა, მომავალი მინისტრის ვინაობას პრემიერ-მინისტრი დაასახელებს.

„ვინ იქნება სოფლის მეურნეობის მომავალი მინისტრი, მე ვერ გეტყვით, რადგან გადაწყვეტილებას მიიღებს პრემიერ-მინისტრი. მინისტრის მოვალეობას შეასრულებს ჩემი პირველი მოადგილე, ვინაიდან პროცედურებით ეს ასეა გათვალისწინებული“, - განაცხადა ოთარ დანელიამ.

ოთარ დანელიამ დღეს სოფლის მეურნეობის მინისტრის რანგში ბოლო, შემაჯამებელი ანგარიში წარადგინა.

ის „ქართული ოცნების“ მიერ მარტვილისა და აბაშის საარჩევნო ოლქში მაჟორიტარი დეპუტატობის კანდიდატად არის წარდგენილი.

მინისტრმა, ანგარიშის პრეზენტაციისას, ისაუბრა სამინისტროს მიერ განხორციელებულ და მიმდინარე პროექტებზე და აღნიშნა, რომ დარგში პოზიტიური მაჩვენებლები სახელმწიფოს სწორი პოლიტიკის დამსახურებაა. 

ღონისძიებას, საქართველოს პრემიერ-მინისტრთან ერთად, მინისტრთა კაბინეტის წევრები, საქართველოში აკრედიტებული დიპლომატიური კორპუსის, ასევე, არასამთავრობო და დონორი ორგანიზაციების წარმომადგენლები დაესწრნენ.