ყოფილი პრემიერ მინისტრის, ბიძინა ივანიშვილის განცხადებით, კრიზისის პირობებში, რაც რეგიონსა და ევროპაშია, საქართველო ეკონომიკური ზრდის ტემპით ლიდერი სახელმწიფოა.

ამის შესახებ მან გურიაში, რეგიონული მედიის წარმომადგენლებთან შეხვედრაზე განაცხადა.

ყოფილი პრემიერის თქმით, ისეთი ეკონომიკური ზრდის ტემპი, რაც საქართველოს ახალი ხელისუფლების პირობებში აქვს, არასდროს ჰქონია.

მან ასევე აღნიშნა, რომ ლარმა ჯანსაღად აჩვენა საკუთარი თავი სწორი ეკონომიკის პირობებში, რაც საოცრად ძნელი მისაღწევი იყო.

„ეკონომიკური ზრდის ტემპი შესაძლოა არ არის მომხიბლავი დღეს, როგორიც იყო ახალი ხელისუფლების მოსვლის შემდეგ 4 წლის განმავლობაში, თუმცა, შეგახსენებთ, რომ ჩვენ ვართ ლიდერები ეკონომიკური ზრდის ტემპით, რომელიც არასდროს ყოფილა წინა ხელისუფლების დროს. როდესაც რეგიონში არის კრიზისი, როდესაც ევროპაშია კრიზისი, იქ ქვეყანა ვერ გაიზრდება ძალიან მაღალი ტემპებით, მაგრამ ამ პროცესში საქართველო არის ლიდერი ზრდის ტემპებით.

კორუფცია ნულამდეა დასული. სამუშაო ადგილები 2006-12 წლამდე 23 000-ით შემცირდა და ქვეყნიდან გადინების ტემპი იყო ძალიან მაღალი. ჩვენი მოსვლის შემდეგ სამუშაო ადგილები გაიზარდა დაახლოებით 65 000-ით. ამავდროულად, ეს არ გაზრდილა სახელმწიფო სტრუქტურების ხარჯზე, პირიქით, სახელმწიფო სტრუქტურებში დასაქმებულთა რაოდენობა შემცირდა. ვალების ეკონომიკიდან გადავედით ინვესტიციების ეკონომიკაზე. ლარის კურსი ახალი ვალებით რეგულირდებოდა. ნახეთ ახლა როგორი მცურავი კურსი დავიჭირეთ და რა მოხდა რეგიონებში. ლარმა ჯანსაღად აჩვენა საკუთარი თავი სწორი ეკონომიკის პირობებში, რაც საოცრად ძნელი მისაღწევი იყო. როდესაც რეგიონი არის კრიზისში, იქ რომელიმე ქვეყანა ვერ იქნება სუპერწარმატებული, მაგრამ ამ პირობებში ჩვენ ვართ ლიდერები“, - განაცხადა ივანიშვილმა.