პრეზიდენტ გიორგი მარგველაშვილის განცხადებით, საქართველომ ვიზის ლიბერალიზაციის საკითხზე საშინაო დავალება ძალიან კარგად შეასრულა.

ამის შესახებ გიორგი მარგველაშვილმა სასტუმრო „რუმსში“ განაცხადა, სადაც საერთაშორისო კონფერენცია „ევროპის ცვალებადი გეოსტრატეგიული ლანდშაფტი ვარშავის სამიტის შემდეგ“ მიმდინარეობს.

პრეზიდენტის თქმით,  საქართველოს ვიზის ლიბერალიზაციის პროცესის გაჭიანურება ევროკავშირის შიგნით არსებულ პრობლემებს უკავშირდება.

„პირდაპირ რომ გითხრათ, ჩვენ გაცილებით უფრო ორგანიზებული ვართ ამ თანამშრომლობის საკითხში, ვიდრე ევროკავშირი. ჩვენ საშინაო დავალება ძალიან კარგად შევასრულეთ და ქებას ვიმსახურებთ. ვაჩვენებთ, რომ ვიზიარებთ ევროპის ფასეულობებს. ევროკავშირის შიგნით არის გამოწვევები, მათ საკუთარი დღის წესრიგი აქვთ და საკითხები, რომლებიც გადასაწყვეტია“, - განაცხადა გიორგი მარგველაშვილმა.

პრეზიდენტი იმედოვნებს, რომ საქართველო უახლოეს მომავალში მიიღებს ვიზის ლიბერალიზაციას და მას უფრო დატვირთული ევროპული დღის წესრიგი ექნება.

ევროპარლამენტის სამოქალაქო თავისუფლებების, მართლმსაჯულებისა და საშინაო საქმეთა კომიტეტმა (LIBE) საქართველოს ვიზის ლიბერალიზაციის საკანონმდებლო ინიციატივას მხარი დაუჭირა. საზოგადოებრივი მაუწყებლის ინფორმაციით, აღნიშნულ ინიციატივას კომიტეტის 44 წევრმა მისცა ხმა, ხოლო 5 წინააღმდეგ წავიდა. პროცედურის თანახმად, ამის შემდეგ ვიზის ლიბერალიზაციის საკითხზე ევროპარლამენტი, ევროკომისია და ევროკავშირის საბჭო დისკუსიას გამართავენ.