სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენელის, ჯეიმს აპატურაის განცხადებით, მოკავშირეები მოუთმენლად ელოდებიან პოლიტიკურ დისკუსიებს პრეზიდენტთან, პრემიერთან, პარლამენტარებთან, არასამთავრობო სექტორთან და სამოქალაქო საზოგადოებასთან.

მისი თქმითვე, მოკავშირეები ელოდებიან საქართველოში უმაღლესი სტანდარტის არჩევნების ჩატარებას.

„ვფიქრობ, მოკავშირეებისგან მთავარი მესიჯი იქნება ის, რომ განაგრძობენ მხარდაჭერის პოლიტიკას. ისინი კიდევ ერთხელ აღიარებენ იმ წვლილს, რაც საქართველოს შეაქვს ქართველი სამხედროების ჩართულობით. მათ სურთ არსებითი პაკეტის განხორციელების კუთხით არსებული პროგრესის მიმოხილვაც, მოუთმენლად ელოდებიან პოლიტიკურ დისკუსიებს პრეზიდენტთან, პრემიერთან, პარლამენტარებთან, არასამთავრობო სექტორთან, სამოქალაქო საზოგადოებასთან. ისინი ელოდებიან უმაღლესი სტანდარტის არჩევნებს და ელოდებიან კონსენსუსს საქართველოს ევროატლანტიკურ მისწრაფებებზე“, - განაცხადა ჯეიმს აპატურაიმ.

სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენელი ტელეკომპანია „რუსთავი 2“-ის საკითხსაც გამოეხმაურა და აღნიშნა, რომ ნატო თვალყურს ადევნებს მედიის თავისუფლებას, თბილისის ოფისის მეშვეობით.

„რაც შეეხება „რუსთავი 2“-ის საკითხს, ნატო თვალყურს ადევნებს მედიის თავისუფლებას, თბილისის ოფისის მეშვეობით. არ ვიცი რა ფორმით წამოწევენ ამ საკითხს მოკავშირეები, მაგრამ იქნება შეხვედრები სამოქალაქო საზოგადოებასთან და მედიასთან. საერთაშორისო საზოგადოება ორიენტირებულია ქართული მედიის უმაღლეს სტანდარტებზე, როცა საქმე მედიის დამოუკიდებლობას ეხება. ვერ ჩავერევი შიდასამართლებრივ პროცესში, თუმცა მედიის დამოუკიდებლობა ყველა მოკავშირისთვის მნიშვნელოვანია“, - განუცხადა აპატურაიმ „რუსთავი 2“-ს.