სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენელის, ჯეიმს აპატურაის განცხადებით, თბილისში ნატო-ს გენერალური მდივნის, იენს სტოლტენბერგის ხელმძღვანელობით ჩრდილოატლანტიკური საბჭოს სტუმრობა კარგი შანსია ნატო-საქართველოს ურთიერთობისთვის.

ამის შესახებ მან საზოგადოებრივ მაუწყებელთან საუბრისას აღნიშნა.

მისი თქმით, მთელ ჩრდილოატლანტიკურ საბჭოს, მათ შორის გენერალურ მდივანს საქართველოში ვიზიტის დიდი მოლოდინი აქვს.

„მთელ ჩრდილოატლანტიკურ საბჭოს, მათ შორის გენერალურ მდივანს საქართველოში ვიზიტის დიდი მოლოდინი აქვს. პირველ რიგში, ეს არის შანსი რომ კიდევ ერთხელ გავუსვათ ხაზი იმ ახლო ურთიერთობას, რომელიც ჩვენ გვაკავშირებს და მადლობა გადავუხადოთ საქართველოს მთავრობას იმ შრომისთვის, რაც  საერთაშორისო ურთიერთობების კუთხით, განსაკუთრებით კი ნატო-სთვის გასწია, ასევე საიმისოდ, რომ კიდევ ერთხელ გადავხედოთ არსებითი პაკეტის იმპლემენტაციის პროცესს, რომელშიც აშკარა პროგრესს ვხედავთ.

ვიზიტი კარგი შანსია იმისთვის, რომ გამოვხატოთ ჩვენი მოლოდინი მოახლოებული არჩევნების დემოკრატიული სტანდარტებით ჩატარების შესახებაც. ჯამში, ვიზიტის ფარგლებში ბევრ ახალ და მნიშვნელოვან საკითხებს შევეხებით“, - განაცხადა ჯეიმს აპატურაიმ.

თბილისში ხვალ ნატო-ს გენერალური მდივნის, იენს სტოლტენბერგის ხელმძღვანელობით ჩრდილოატლანტიკური საბჭო ჩამოვა. ხვალვე საქართველოს დედაქალაქში ჩრდილოატლანტიკური საბჭოს სხდომა გაიხსნება, რომელსაც ნატო-ს გენერალური მდივანი უხელმძღვანელებს. ჩრდილოატლანტიკური საბჭოს სხდომის გარდა, რომელიც 7-8 სექტემბერსაა დაგეგმილი, იენს სტოლტენბერგი საქართველოს ხელისუფლების პირველ პირებთან შეხვედრებსაც გამართავს.