პრემიერ მინისტრ გიორგი კვირიკაშვილის განცხადებით, რუსეთი ოკუპირებული აფხაზეთის და ე.წ.სამხრეთ ოსეთის დე ფაქტო მთავრობებზე დიდ გავლენას ახდენს.

ამის შესახებ მან საერთაშორისო კონფერენციაზე - „ევროპის ცვალებადი გეოსტრატეგიული ლანდშაფტი ვარშავის სამიტის შემდეგ“ თქვა.

როგორც მთავრობის მეთაურმა აღნიშნა, რუსი ოკუპანტები საოკუპაციო ხაზის მახლობლად მისი გადაკვეთის გარეშეც კი ყოველდღიურად აკავებენ ეთნიკურ ქართველებს.

პრემიერის თქმით, საქართველოს მთავრობის და მთლიანად პოლიტიკური ისტებლიშმენტის მიზანია, როგორმე შეარბილოს რისკები და თავიდან აიცილოს სერიოზული გართულებები.

„რუსეთი დიდ გავლენას ახდენს ოკუპირებული აფხაზეთისა და ე.წ.სამხრეთ ოსეთის დე ფაქტო მთავრობებზე. რამდენიმე თვის წინ საოკუპაციო ხაზზე ქართველი მოკლეს. კამერამ გადაიღო მკვლელი და ეს ადამიანი ჯერ კიდევ თავისუფალია. რასაკვირველია, ჩვენ ვხედავთ, რომ ეს პროცესი უარყოფით ზეგავლენას ახდენს მთავრობის იმიჯზე, მმართველი პარტიის იმიჯზე. ყოველდღიურად აკავებენ ეთნიკურ ქართველებს საოკუპაციო ხაზის მახლობლად მისი გადაკვეთის გარეშეც კი, როდესც ისინი საქონელს მწყემსავენ, შეშას აგროვებენ. რამდენიმე დღით ციხეში ჰყავთ გამოკეტილი, დაკავებული და ეს პროცესი, რა თქმა უნდა, ხელს უშლის საქართველოს სტაბილურობას“, - განაცხადა გიორგი კვირიკაშვილმა და დასძინა, რომ  რუსული პროპაგანდა დაინტერესებულია იმით, რომ ამ რეგიონში თავისი ზეგავლენა დაიმკვიდროს.