კახა კალაძე, რომელიც სამი წელია ჩემთან ურთიერთობაშია, ყველა გზაზე ჩასაფრებულისა და ფეხის დამდების პოზიციიდან მებრძვის, - აღნიშნული განცხადება თავდაცვის ყოფილმა მინისტრმა, გორის მაჟორიტარი დეპუტატობის კანდიდატმა, ირაკლი ოქრუაშვილმა ,,TV პირველის” პირდაპირ ეთერში გააკეთა.

"მაყურებელს რომ კითხვის ნიშანი არ გაუჩნდეს, რა შუაშია კახა კალაძე, მე ერთ ისტორიას მოვყვები. 2013 წელს, საერთოდ არ ვაპირებდი პოლიტიკაში დაბრუნებას. მინდოდა ბიზნესში, ენერგეტიკაში რაღაც პროექტის დაწყება – გორში ქარის წისქვილების დამონტაჟება. შესაბამისი წინადადებით მივმართე მას და მისგან სრული იგნორირება მივიღე. ის ხელმძღვანელობდა უშუალოდ ჩემი საარჩევნო რეგისტრაციის გაუქმების პროცესს 2014 წლის ადგილობრივ არჩევნებზე. ის ხელმძღვანელობდა ამას, როგორც ცენტრალურ საარჩევნო კომისიაში, ასევე სასამართლოებში. ის ხელმძღვანელობდა არჩევნებს მთლიანად გორში, სადაც მიუხედავად იმისა, რომ გამარჯვებას მივაღწიე, ის მომპარეს და წამაგებინეს.

ის ხელმძღვანელობდა გუშინდელ საკრებულოს სხდომაზე ჩემი თანაგუნდელის, ილია მეტრეველის გადაყენებას. მან წინასწარვე იცოდა, რომ თუ ამას გააკეთებდნენ, მე არაფერი ასარჩევი აღარ მექნებოდა, თუ არა ის ნაბიჯი, რომელიც გუშინ გადავდგი....

მე "ქართულ ოცნებასთან" საკმაოდ კონსტრუქციული ვიყავი და საკმაოდ მკაფიო გზავნილები მქონდა. არ ვაპირებდი ამ დოკუმენტის გასაჯაროებას და არ ვაპირებდი მათ თამაშში შუაში ჩადგომას. მაგრამ თუ იქნებოდა გადაყენებული ჩემი თანაგუნდელი, მე სხვა არაფერი მრჩებოდა. გუშინ გადააყენეს ჩემი თანაგუნდელი და მე სხვა გზა აღარ დამრჩა", –განაცხადა ირაკლი ოქრუაშვილმა.