საპარლამენტო უმრავლესობის წევრი გიორგი ვოლსკი "რესპუბლიკური პარტიის"ლიდერის, დავით უსუფაშვილის მიერ ამერიკული ბაზების საქართველოს ტერიტორიაზე განთავსებასთან დაკავშირებით გაკეთებულ განცხადებას არაკომპეტენტურს უწოდებს.

„რამდენად მისაღებია ჩემთვის ამერიკული ბაზის არსებობა საქართველოში, როგორც ამას უსუფაშვილი ამბობს? - უნდა დავსვათ შეკითხვა, რამდენად მისაღებია ეს განცხადება, მაშინ როდესაც ცნობილია, რომ ჩვენ ნატო-ს მიმართულებით საკმაოდ აქტიურად მივდივართ. მე ვფიქრობ, რომ არაკომპეტენტურობა გამოსჭვივის ამ საუბრიდან და წინასაარჩევნო პერიოდში გარკვეული ნიშის დაკავების სურვილი აქვს, რომელიც დიდი ხანია უკვე დაკავებულია, ვინაიდან ევროატლანტიკური ინტეგრაცია არის ის ძირითადი მიმართულება, რომელსაც ხელისუფლება ახორციელებს. მათ შორის, გარკვეული პერიოდი დავით უსუფაშვილიც მონაწილეობდა და ძალიან კარგად იცის მან და სხვებმაც, რომ ამ სვლას სჭირდება საკმაოდ დინჯი თანამშრომლობის ის რეჟიმი, რომელიც, პრინციპში, გაგვაჩნია.

ნატო არ შედგება მხოლოდ ერთი სტრუქტურისგან, ნატო არის ქვეყნების გაერთიანება და ამ ქვეყნებთან საკმაოდ ინტენსიური თანამშრომლობა მიმდინარეობს. ეს არის სტაბილური თანამშრომლობა, რომელიც ემსახურება საქართველოს ინტერესებს, მის უსაფრთხოებას და არა მარტო საქართველოს ინტერესებს, მსოფლიოს ინტერესებსაც, რომ საქართველო იყოს მოკავშირე, ერთობ მძლავრი და მშვიდობაზე ორიენტირებული სამხედრო გაერთიანების“, - განაცხადა გიორგი ვოლსკიმ დღეს გამართულ პრესკონფერენციაზე.